Breudwd Rhyddiaith Gymraeg 1300-1425
English

LlGC Llsgr. 3035 (Mostyn 116) – tudalen 52v

Brut y Brenhinoedd

52v

aỻyssei y|gymell drỽy arueu ac ymladO enryfed gene+
dyl y|brytanyeit a gymheỻassant dỽy weith y gỽr hỽnỽ
ar fo yr hỽn ny aỻỽys yr hoỻ vẏt gỽrthỽnebu* idaỽ.
Ac ỽynteu yr aỽr hon yn foedigyon rac hỽnnỽ. Ac eis+
soes yn gỽrthỽynebu idaỽ yn ỽraỽl Ac yn paraỽt y|dio+
def dros eu gỽlat a|throstunt e|hunein. Ac ym|pen yr
eil dyd gỽedy gỽarchae kaswaỻaỽn ym pen y|mynyd
hỽnnỽ. Ac nat oed na bỽyt na diaỽt. ofynhau a|oruc
kaswaỻaỽn rac newyn bot yn dir idaỽ ymrodi yg
karchar vlkessar. Sef a|oruc anuon at auaroy y erchi
idaỽ y tagnefedu ac vlkessar rac y genedyl coỻi teilyg+
daỽt y teyrnas gỽedy darffei dala kaswaỻaỽn A|me+
negi idaỽ kyt ryfelei ef talym ar auarỽy y·r|y|dares+
tỽg a|e gospi na mynei ef eissoes y ageu ef yr hẏnẏ
A gỽedy menegi hynny y auarỽy. Yna y|dywaỽt.
ynteu nat oed haỽd karu tywysaỽc a vyd gỽar
ar ryfel megys oen. Ac a|uyd creulaỽn a|dywal
megys ỻeỽ ar yr hedỽch Oi a|dỽyeu nef a|daẏar
yr aỽr hon y|mae y|m gỽediaỽ. i. y|gỽr a oed arglỽyd
arnaf inheu gynheu. Yr aỽr hon y|mae ef yn damu+
naỽ y|tagnefedu drỽy darystygedigaeth y vlkessar
kyn no hyn kaffel tagnefed y|gantaỽ Ac ỽrth hynnẏ
ef a|dylyei vedylyaỽ ac edrych yn iaỽn ỽrth y|gỽr hỽnỽ
drỽy ryr hỽn y gaỻỽys ef gỽrthlad amheraỽdẏr ru+
fein o|e teyrnas a|e dỽyn idi y dryded weith o|e anuod.
Ac ỽrth hẏnẏ nyt oed iaỽn dadleu a|miui yg kam
nac yn enwir. kan geỻeis gỽneuthur y|gỽassanaeth
hỽn. hynnẏ o anoethineb ac aghymendaỽt yỽ gỽneuthur
saraedeu ac ymgeinuaeu y|r neb y kaffer y vudugol+
yaeth drỽydaỽ yn wastat. Kany eiỻ vn tywysaỽc