LlGC Llsgr. 3035 (Mostyn 116) – tudalen 187v
Brut y Tywysogion
187v
dolder a|e teruyneu a gỽedy kytsynyaỽ ac ef ar hẏnẏ hoỻ
tywyssogyon kẏmrẏ kynuỻaỽ diruaỽr lu a|oruc a|mynet y
ymlad a|chasteỻ paen a gỽedy bot yn ymlad ac ef teir ỽyth+
nos hayach heb ỽybot y|damwein rac ỻaỽ. a|phan ỽybu ẏ
saesson hẏnẏ goỻỽg a|wnaethant ruffud ap rys a oed yg|carch+
ar gantunt a|chynuỻaỽ kedernit ỻoegẏr y·gyt ac ef ar
vedẏr hedychu a|r|kymrẏ ac yna ny|mynaỽd y kymrẏ he+
dỽch y gan y|saesson. namyn gỽedy caffel y casteỻ bygy+
thyaỽ a|wnaethant losgi y|dinassoed a dỽyn y hanreitheu
a heb diodef o|r saesson hẏnẏ ỽynt a|e kyrchassant ac y+
n|y vrỽydyr gyntaf a|e kymheỻassant ar fo drỽy wneuthur
diruaỽr aerua o·nadunt. ac yna y ỻas anaraỽt ap ywein
ap katwaỻaỽn. a ridit ap jestin a rodri ap hywel ac y delit
Maredud ap kynan ac y carcharỽyt. ac veỻy y doeth y|saes+
on yn ỻawen drachefyn drỽy vudugolyaeth wedy y kyuo+
ethogi o yspeil y kymrẏ. Y vlỽydẏn hono y goresgynaỽd
gruffud ap rys yn ỽraỽl y|ran oỻ o|e gyuoeth y gan vaelgỽn
y|vraỽt eithẏr deu gasteỻ nyt amgen aber teiui ac ystrat
meuruc. a|r neiỻ onadunt nyt amgen aber teiui a|tygaỽd
maelgỽn vch ben amrauaelon greireu y gỽyd myneich ỽedy
kymrẏt gỽystlon y gan ruffud dros hedỽch y|rodi y casteỻ
a|r gỽystlon y·gẏt yn oet dẏd y ruffud a|r ỻỽ hỽnỽ a dremyga+
ỽd ef heb rodi na|r casteỻ na|r gỽystlon. dỽywaỽl nerth eissoes
a rydhaaỽd y gỽystlon o garchar gỽenỽynỽyn. Y vlỽydyn hono
y bu varw pyrs esgob myniỽ. Y vlỽẏdẏn rac·ỽyneb y goresgyn+
aỽd Maelgỽn ap rys gasteỻ dineirth a a·deilassei ruffud ap rys
a chymeint ac a gauas yno o|wyr. ỻad rei a|wnaeth a|charcha+
ru ereiỻ. ac yna y goresgynaỽd gruffud ap rys drỽy dỽyỻ
| « p 187r | p 188r » |