LlGC Llsgr. 3035 (Mostyn 116) – tudalen 182v
Brut y Tywysogion
182v
y wlat. Y vlỽydyn hono y|gỽeresgynaỽd dauid ap ywein gỽy+
ned idaỽ e|hun ynys von wedy dehol o·honaỽ vael·gỽn ap
ywein y vraỽt hyt yn jwerdon. Y vlỽydyn rac·ỽyneb y go+
resgynaỽd dauid ap ywein hoỻ ỽyned wedy gỽrthlad o+
honaỽ y hoỻ vrodyr a|e hoỻ ewythred. Y|vlỽydyn hono y
delis dauid ap ywein vael·gỽn y vraỽt ac y karcharaỽd.
Yn|y vlỽydyn hono y bu varỽ kynan ap ywein gỽyned. Yn|y
vlỽydẏn wedy hẏnẏ y delis hỽel ap. joruerth. o gaer ỻion heb ỽybot
ỽy*|tat ywein pen carun y|ewythẏr a gỽedy tynu y lygeit
o|e ben y|peris y yspadu rac meithrẏn etifed ohonaỽ a whe*+
dychei gaer ỻion wedy hẏnẏ. ac yna o|deissyfyt gyrch a*
gỽeresgyn y|freinc gaer ỻion ac y gyrrassant ymeith ody+
no Joruerth a hỽel y vab Yn|y vlỽydyn hono yr hedychaỽd henri
vrenhin hynaf a|henri jeuaf gỽedy diruaỽr distrywedi+
gaeth normandi a|e chyfnessafyeit wledyd ac yna y delis
dauid ap ywein drỽy dỽyỻ rodri ap ywein y vraỽt vn vam
vn dat ac ef ac y|kadarnhaaỽd myỽn gefyneu am geissaỽ
kyfran o dref y|tat gantaỽ. ac yna y priodes y dauid hỽnỽ
dam em whaer y|r brenhin ỻoegyr drỽy debygu gaỻel
o·honaỽ kael y gyuoeth yn ỻonyd hedychaỽl o|r achaỽs
hono. ac yna y|diegis rodri o garchar dauid y vraỽt a
chyn diwed y vlỽẏdẏn y gỽrthladaỽd ef dauid o von ac
o|ỽyned yny doeth drỽy afon gonỽy. ac yna yd ymbara+
toes yr arglỽyd rẏs ap gruffud ỽrth vẏnet y lys y|bren+
hin hẏt ẏ gaer loeỽ ac y|duc y·gyt ac eff drỽy gygor y bren+
hin hoỻ dywyssogyon y|deheu a vuessynt yg|gỽrthỽyneb
y|r brenhin nyt amgen katwaỻaỽn ap Madaỽc o velenyd
y gefynderỽ ac einaỽn clut o eluael y|daỽ gan y verch.
| « p 182r | p 183r » |