LlGC Llsgr. 3035 (Mostyn 116) – tudalen 129v
Brut y Brenhinoedd
129v
nuỻaỽ y gỽasgaredic lu y·gyt yd aeth hyt yg kaer wynt.
A|gỽedy clybot o wenhỽyfar hẏnẏ dio·beithaỽ a oruc a|my+
net o gaer efraỽc hẏt yg|kaer ỻion ar ỽysc. Ac yno y|myỽn
manachlaỽc gỽraged oed yno; gỽisgaỽ yr abit ymdanei
ac adaỽ kadỽ y|diweirdeb yn eu plith o hyny aỻan A|r a+
bit hono a vu ymdanei hyt agheu
A c odyna arthur a gymerth ỻit maỽr yn·daỽ am goỻi
ohonaỽ y|saỽl vilyoed hẏnẏ A|pheri cladu y|wyr. A|r
trydyd dyd kyrchu kaer wynt a|oruc Ac yn dianot
y|chylchynu. Ac yr hynẏ ny pheidỽys medraỽt a|r hyn
a dechreuyssei. Namyn gan anoc y|wyr eu gossot yn vy+
dinoed A|mynet aỻan o|r dinas y ymlad ac arthur y|ewythyr
A|gỽedy dechreu ymlad aerua vaỽr o|pop parth a wnaethant
Ac eissoes mỽyaf vu yr aerua o wyr medraỽt Ac yn dy+
bryt kymeỻ arnaỽ a·daỽ y|maes Ac ny han·denỽys
medraỽt yna gohir ỽrth gladu y ladedigyon namyn ffo
a oruc parth a chernyỽ Ac ỽrth hyny arthur yn bryderus
ac yn ỻidyaỽc o achaỽs dianc y|tỽyllỽr y gantaỽ yn|y ỻe
a|e hymlynỽys hyt y wlat hono hyt ar lan kamlan y
ỻe yd oed vedraỽt yn|y arhos. Ac ỽrth hyny Megys yd
oed vedraỽt gleỽhaf a gỽychraf yn kyrchu yn|y ỻe gos+
sot y varchogyon yn vydinoed a oruc. kanys gỽeỻ oed
gantaỽ y lad neu ynteu a orffei. no fo yn hỽy no hyny
kanys yd oed etwa gantaỽ o eiryf trugein|mil. Ac
o|hyny y gỽnaeth ef wech bydin a wech gỽyr a|thruge+
in a|wechant a|whe|mil ym|pop bydin o|wyr aruaỽc
Ac o|r rei nyt aeth yn|y wech bydin. Ef a wnaeth bydin
idaỽ e|hun A rodi ỻywodron y|pop bydin oỻ A|dyscu
paỽb o·nadunt ac eu hanoc y ymlad a|oruc gan adaỽ
vdunt enryded a|chyfoeth os ef a orffei Ac o|r parth
arall
| « p 129r | p 130r » |