Breudwd Rhyddiaith Gymraeg 1300-1425
English

LlGC Llsgr. Llanstephan 4 – tudalen 50v

Purdan Padrig

50v

nessaaỽd ef att y porth; y porth a|agores
yn|y erbyn hanner miỻtir o|let. a chyn
decket oed yr arogleu a doeth o|r porth
a chyt bei yr hoỻ vyt yn ireit gỽyrth+
uaỽr. a maỽrder yr hynaỽster hỽnnỽ
a|wnaeth idaỽ kymryt nerthoed mal
y tebygei ef nat oed volest ganthaỽ
godef elchỽyl yr hoỻ boeneu a odef+
assei gynt. ac ef a edrychaỽd o vyỽn
y porth. ac yno ef a|welei gỽlat oed e+
glurach no|r heul pan vei egluraf.
ac nyt oed ryued kyt chỽennychei
ef mynet y|myỽn. Gỽynn oed y vyt
y dyn yd agorit idaỽ y ryỽ borth
hỽnnỽ. a|r neb a|adaỽd y marchaỽc
y vynet yno ny|s|tỽyỻaỽd. kanys pan
doeth ef yno y|myỽn y doeth ryỽ bro+
cessio yn|y erbyn yn gyweir o grogeu
a ỻumanneu a thapreu kỽyr. a chang+
eu budugolyaeth eur megys na
welet eiryoet yn|y byt hỽnn ymma
y ryỽ brocessio hỽnnỽ y veint. Yno
y gỽelei ef dynyon ym|pob ryỽ urdas
ac ym|pob creuyd gỽyr a gỽraged.
Jeueingk a hen. Ereiỻ megys aba+
deu. ereiỻ megys canonwyr myneich