Breudwd Rhyddiaith Gymraeg 1300-1425
English

LlGC Llsgr. Llanstephan 4 – tudalen 31v

Buchedd Beuno

31v

le yn aruon a|elwir gwaredaỽc. a beuno a
rodes y|r brenhin gwaeỻ eur a|rodassei gy+
nan uab brochỽel idaỽ ynteu pan vuassei
varỽ. a|r|waeỻ honno a|dalei drugein|mu.
Ac yno yd adeilyaỽd beuno eglỽys. ac y
dechreuaỽd adeilat mur yn|y chylch. Ac
ual yd oed dydgỽeith yn gỽneuthur y
mur hỽnnỽ a|e disgyblon gyt ac ef. na+
chaf y gỽelynt yn|dyuot attunt gỽreic
a mab newyd eni yn|y harffet. ac yn erchi
y veuno vedydyaỽ y mab. Heb·y beuno
ha|wreic arho origun yny orffennwyf
hynn. a|r mab yn wylaỽ ual nat|oed haỽd
y diodef. Ha wreic heb·y beuno ffest a beth
yd|wyl y mab. Ha|wrda sant heb y wreic
y mae achaỽs idaỽ y hynny. Ha|wreic da
heb·y beuno pa achaỽs yỽ hỽnnỽ Dioer
heb y wreic y tir yd ỽyt|ti yn|y vedyannu
ac yn adeilyat arna tref tat y mab yỽ.
Yna y dywaỽt beuno ỽrth y disgyblon.
Tynnỽch aỽch dỽylaỽ heb ef y ỽrth y gỽeith
tra vedydywyf y mab. a pharattoỽch ym
vyg|kerbyt. ni a|aỽn ygyt a|r wreic honn
a|r mab y ymwelet a|r|brenhin y gỽr a|ro+
des ymi y dref tat ef. Ac yna y|kychwy+
naỽd beuno a|e disgyblon ygyt a|r wreic