Breudwd Rhyddiaith Gymraeg 1300-1425
English

LlGC Llsgr. Llanstephan 27 (Llyfr Coch Talgarth) – tudalen 92r

Mabinogi Iesu Grist

92r

owenu a|e gỽarandewis. Joseph a erchis idi yna tewi a|e chwer+
thin. Byd gaỻ heb ef yny delont y myỽn rac bot yn reit ytt
ỽrth eu medegynyaeth. a meir a|erchis udunt dyuot y myỽn
attei. a solome a doeth. a salome ny doeth. a solome a|dywaỽt
ỽrth veir wynuydedic. Gat ti heb hi y mi gyhỽrd a|thi. a phan
gyhyrdaỽd o lef uchel hi a|dywaỽt. Arglỽyd arglỽyd maỽr
trugarhaa ỽrth·yf|i. ny chlyỽspỽyt ac ny welet bronneu yn
ỻaỽn o laeth. a geni mab a|e uam yn wyry yn ymdangos
ac nat oes lygredigaeth gỽaet. nac arỻỽybyr na|dolur ar y
neb a esgores. Gwyry kynn|esgor. a gỽyry yn trigyaỽ gỽedy es  ̷+
gor ual y mae yn amlỽc. Yr hynn a|glywaf yny profỽyf
ny|s credaf heb·y salome o·dieithyr yny gỽelỽyf. ac att y wyn+
uydedic ueir y doeth hitheu. ac y dywaỽt ual hynn. Gat ti
y mi heb hi dy balualu ual y crettỽyf o|r hynn a glywaf. Ac
yna y kanhataỽd meir y phrofi. a|hitheu a|estynnaỽd y ỻaỽ
parth ac att veir. ac yn diannot y ỻaỽ a diffrỽythaỽd idi. ac
o|diruaỽr boen a dolur wylaỽ a|oruc yn ry vlaenỻym dan leue+
in a|dywedut ual hynn. Ti arglỽyd adnabuost ovynhav o+
honaf|i dydi yn wastatat*a|r|tlodyon a nertheis heb dal. a|r
gỽraged gỽedwon a|r meibyon ymdiueit mi a|e kanhorthỽy+
eis. ac a vei eissiwedic iaỽn nyt aeth y ỽrthyf yn amnac. o|r
hynn a|erchynt. ac yr aỽrhonn y syrthyeis i o achaỽs vy
angcredadunyaeth yn trueni y|th edrych di veir wyry. A ph+
an dywaỽt hi hynny yd ymdangosses gỽas ieuangk tec
yn echtywynedic o eglurder geyr y ỻaỽ. ac y dywaỽt ỽrthi
dynessa att y mab ac adola idaỽ. a|dot dy laỽ arnaỽ. ac ef
a|th iachaa yn|diannot. kanys ef yssyd iechyt y|r rei gobethi+
aỽl.