Breudwd Rhyddiaith Gymraeg 1300-1425
English

LlGC Llsgr. Llanstephan 27 (Llyfr Coch Talgarth) – tudalen 80v

Ystoria Adda

80v

ỽrth uodlonhau o duỽ offrỽm abel yn vỽy no|r eidaỽ ef.
ac o gas a maỽr greulonder y ỻadaỽd ef y vraỽt ac asgỽrn
gen assen. a phan weles adaf ỻad o|r braỽt y ỻaỻ. ef a|dy+
waỽt. ae tydi uy niat greir o wreic. Duỽ a|wyr na|dygyf+
nesseeis i trỽy bechaỽt att vyng|gỽreic. ac ỽynt a yttoed+
ynt deu·gein mlyned a chant o oet. a gỽedy hynny trỽy
gymenediweu duỽ ef a greaỽd mab yr|hỽnn a|elwit seth.
a hỽnnỽ a|vu wr da ac ufud y dat. a gỽedy hynny y bu
vyỽ adaf. seith cant mlyned. ac ef a|greaỽd ỻawer o vei+
byon a merchet. ac ueỻy y bu vyỽ adaf gan gyfrif y hoỻ
vlỽynyded y·gyt deng mlyned ar|hugeint a naỽ cant yn dyff+
ryn ebron. Ac yn|y diwed gỽedy diodef ohonaỽ traỻaỽt
maỽr a ỻauuryaỽ y daear. kysgu a|oruc ef a gorffowys
a|e bỽys ar vynybyr y geib. a|dechreu a|oruc ystyryaỽ am y
hir uuched a|e vaỽr draỻaỽt a|e dryged a|e doluryeu hyt
pan gassaei ef y vyỽ. ac y damunei y angeu. ac yn|y medỽl
hỽnnỽ galỽ seth y vab attaỽ a|oruc. a|dywedut ỽrthaỽ. mab
dyret yma. mi a|th anuonaf y baradwys att cherubin yr
angel yssyd yn|kadỽ prenn y uuched. a chledyf tan yn|y
laỽ. ac yn|y droi bop amser. a|r mab a|dywaỽt. vyn|tat pa+
raỽt ỽyf|i a|dangos ym|fford. a manac ym beth a|dywettỽ+
yf ỽrthaỽ. a|e dat a|dywaỽt idaỽ. Dywet ỽrthaỽ vot yn
gas gennyf|i vy muched. a gỽedia drossof|i idaỽ anuon
yn hyspys am y drugared a edewis duỽ ym pan ym|bỽry+
aỽd i y maes o baradỽys. a dos di ar|hyt y dyffrynn hỽnn
tu a|r dỽyrein. a chynnal yr vn fford las trỽy yr honn ẏ
deuthum i odyno. a thrỽy hynny yd adnabydy di y fford
o achaỽs