Breudwd Rhyddiaith Gymraeg 1300-1425
English

LlGC Llsgr. Llanstephan 27 (Llyfr Coch Talgarth) – tudalen 79r

Ystoria Adda ac Efa

79r

O·dyna y dywaỽt eua ỽrth adaf. Ti wr vy arglỽyd i ti a|dylyy
vot yn vyỽ. a|r bywyt a|dyly bot y·gyt a|thi. kanny wnaeth+
ost di cam. namyn mi a|e goruc. a|mi a|dỽyỻỽyt. kanys y
gorchymyn kyntaf a|r eil mi a|e gedeweis dros gof. a|r aỽr+
honn mi a|af y oleuat y byt y·dan ogysgaỽt yr|heul. ac yno
y trigyaf hyt vy angeu. ac yna y|dechreuaỽd hi kerdet parth
a|r occident yn|drist druan doluryus. Yno y gỽnaeth hi ỻu+
est. kanys yn ueichaỽc yr|oed ar uab a merch o trimis
eu hoet. ac yno y bu hi yny doeth amser idi esgor. Eua
yna a|dechreuaỽd gỽediaỽ y|r arglỽyd duỽ. ac ny warande+
wis dim o|e gỽedi. na|e drugared ef ny aỻei vot y·gyt a|hi.
Yna y dywaỽt eua ỽrthi e|hun. gỽae vi heb hi pỽy a vyd
negessaỽl y mi att vy arglỽyd adaf. Mi a|adolygaf y o+
leuat o|r nef troi parth a|r|dỽyrein. a menegi y adaf vyn
doluryeu. ac eu menegi a|orucpỽyt idaỽ. Yna y dywaỽt a+
daf. mi a|af y edrych a|dỽyỻaỽd y sarff hi etto o newyd. Yna
yd aeth adaf yny doeth hyt y ỻe yd oed y wreic. Ac yna y kafas
ef hi yn|doluryus ovalus wylovus. Yna y dywaỽt eua ỽrth
adaf. A eỻy di arglỽyd ysgaỽnhau arnaf|i vyn|doluryeu. Gỽe+
dia di y|n arglỽyd ni drossof i y waret vyn doluryeu. ac y
drugarhau ỽrthyf ac y|m|rydhau. ac adaf a dechreuaỽd gỽe+
diaỽ drosti. a|e wedi ef a|warandewis duỽ. Ac yna y doeth deu+
dec angel a gỽyrtheu duỽ ganthunt o|r parth deheu udunt.
ac o|r parth assỽ. a mihangel rac y|bronn o|r parth deheu i+
di. a|e chymryt y vyny a|oruc a|dywedut ỽrthi. Eua ben+
digedic ỽyt ti. ac yr|dy arglỽyd di adaf. a|e wedieu maỽr ef.
y|m hanuonet i attat ti. Kyuot ac ymarlỽya. ef a vyd etiued
ytt