Breudwd Rhyddiaith Gymraeg 1300-1425
English

LlGC Llsgr. Llanstephan 27 (Llyfr Coch Talgarth) – tudalen 77r

Ystoria Adda ac Efa

77r

adaf. Arglỽyd heb hi y mae arnaf|i newyn a|gaffaf|i dim bỽyt.
Na ỽnn heb yr adaf. aỽn y geissyaỽ bỽyt. ac y edrych a uyn+
no duỽ rodi ynni drugared am vỽyt. a mynet a|wnaethant
y bop ỻe yn eu kylch. ac ny chaỽssant neb·ryỽ vỽyt ac a|gaỽs+
sant ym|paradỽys. ac yna y dywaỽt eua ỽrth adaf. arglỽyd
a|debygy di a|vydaf uarỽ i rac newyn. vy ewyỻys i oed vy
marỽ. ac ar damchwein ti a vydy drachevyn ym paradwys.
kanys o|m achaỽs i y sorres duỽ ỽrthyt ti. ỻad di vyui ka+
nys o|m achaỽs i y|th|yrrwyt ti o baradwys. mal y gaỻỽyf
uarỽ. adaf a attebaỽd idi. Eua na|dywet ti y ryỽ·beth hyn+
ny. a vynnut ti dodi yr eil emeỻtith arnam ni. Pa|ffuryf
y gaỻỽn ni dodi vy ỻaỽ ar vyng|knaỽt vy hun kyuot ti
ac aỽn y geissyaỽ yn bỽyt. a chyuodi a|orugant. a seith
niwarnaỽt yd aethant. ac ny chaỽssant dim onyt megys
aniueilyeit. Yna y|dywaỽt adaf ỽrthi. y bỽyt hỽnn a|rodes
duỽ y|r aniueilyeit. a|n bỽyt ninneu oed megys bỽyt engyl+
yon. Eissyoes iaỽn a|theilỽng y coỻassan ni rat rac ~
bronn yn kreaỽdyr am dorri ohonam gorchymynneu yn
gỽir duỽ. ac ỽrth hynny ediuarhaỽn ni o ỽrthrỽm benyt.
megys y gaỻei duỽ rodi trugared ynn. Yna y dywaỽt eua
ỽrth adaf. arglỽyd dyro di ymi benyt megys y gaỻỽyf y
diodef mal na sorro y creaỽdyr ỽrthym am vyng|kam i.
eissyoes. medylya di benyt megys y gaỻỽyf|i y|dỽyn. kanys
o|m achaỽs i y mae arnat ti y ỻauur hỽnn. Yna y dywaỽt
adaf ỽrth eua. ny eỻy di diodef o dydyeu kymeint ac a|aỻafi.
Kymeint eissyoes a gymery di ac a|wney ac y bych iach o|th
bechodeu. a minneu deugein niwarnaỽt a vnprytyaf. a|dos