Breudwd Rhyddiaith Gymraeg 1300-1425
English

LlGC Llsgr. Llanstephan 27 (Llyfr Coch Talgarth) – tudalen 74v

Buchedd Beuno

74v

heb·y beuno pa achaỽs yỽ hỽnnỽ. Dioer heb y wreic y tir
yd ỽyt ti yn|y vedyannu. ac yn adeilyat arnaỽ tref·tat y
mab yỽ. Y·na y dywaỽt beuno ỽrth y disgyblon. Tynnỽch
aỽch dỽylaỽ heb ef y ỽrth y gỽeith tra vedydyỽyf y mab. a
pharatoỽch ym vyng|kerbyt. ni a aỽn y·gyt a|r wreic honn
y ymwelet a|r brenhin y gỽr a rodes ymi y tref·tat ef. Ac
yna y kychỽynnaỽd beuno a|e disgyblon y·gyt a|r wreic a|r
mab. ac y doethant hyt yng|kaer seint yn|y ỻe yd oed y bren+
hin. yr aỽr·honn y gelwir y ỻe hỽnnỽ y gaer yn aruon.
Ac yna y dywaỽt beuno ỽrth y brenhin. Paham heb ef y
rodeist di y mi tref·tat neb na|e|dylyet. Pa achaỽs heb y bren+
hin pa|le y mae y neb a|e|dyly ef. Y mab heb·y beuno yssyd
yn arffet y wreic racko a|dyly y tir. ac yssyd etiued arnaỽ.
Dyro di heb·y beuno y|r mab y tir. a dyro y minneu dir araỻ
am hwnnỽ. neu dyro ym y rod a|rodeis i ytti. Sef yỽ honno
y waeỻ eur. Sef y rodes y brenhin atteb trahaus balch y veu+
no. Ny newidiaf|i heb ef a|thydi vn tir. Y rod a rodeist ditheu ymi
minneu a|e roessum hi y araỻ. Sef a|oruc beuno yna ỻidiaỽ
a|dywedut ỽrth y brenhin. Mi a archaf y duỽ heb ef na bo
hir y medych di ar dir a|daear. a mynet ymeith a|oruc beu+
no a|e adaỽ ynteu yn emeỻtigedic. Keuynderỽ oed y|r brenhin
a|elwit gỽideint. a hỽnnỽ a|gerdaỽd yn ol beuno. ac a|e godiw+
edaỽd y tu araỻ y|r auon a|elwir seint. y ỻe yr|oed veuno yn e+
isted ar uaen yng|glann yr auon. a|hỽnnỽ a rodes dros y e+
neit e|hun. ac eneit kadwaỻaỽn y gevynderỽ y duỽ a beuno
y dref e|hun a|elwit keỻynnaỽc yn dragywydaỽl. heb ual ac
heb ardreth. a heb uedyant y dyn o|r|byt arnei. ac yno y gỽ+