Breudwd Rhyddiaith Gymraeg 1300-1425
English

LlGC Llsgr. Llanstephan 27 (Llyfr Coch Talgarth) – tudalen 51r

Deuddeg Pwnc y Gredo, Pwyll y Pader, Awstin

51r

gallon. ac a|at y didanỽch bydaỽl y|dỽyỻaỽ. ac a|ery y|dyd maỽr
kyflaỽn o var duỽ. yr hỽnn a|lysc y mynyded. ac a|oỻỽng y def+
nydyeu o|r ffuruauen yn|ffrydyeu tan ar benneu y pechadury+
eit. Ac yn|y dyd hỽnnỽ y dyrcheif gỽirion y benn. ac y gỽneir idaỽ
gỽbyl iaỽn am y goỻedeu a|e sarhaedeu y gan y rei ennwir. A|r
pỽng uchot a|ossodes thadeus iudas ebostol. Y pymhet pỽngk
yỽ. vitam eternam. amen. Sef yỽ hynny. Mi a|gredaf kaffel o|r se+
int buched ogonet yn|y nef y·gyt a|duỽ yn dragyỽydaỽl. yr honn
a rodo duỽ y ninneu y·gyt ac ỽynteu. a|r pỽngk diwethaf hỽnn
a|ossodes mathias ebostol. A|r|deudec|pỽngk hynn o annoc yr ys+
pryt glan a|gyweiryassant y deudec ebystyl yn|y gret. kynn ym+
wahanu o·honunt un y ỽrth y gilyd y rannu y bregethu trỽy|r
byt. ac ual y dyweit iessu grist yn|yr euengyl. Y rei a|grettont
ac a|uedydyer. y rei hynnẏ a|gaffant nef. a|r rei ny chrettont ac
ny uedydyer. y rei hynny heb amgen a|ant y|nghyuyrgoỻ tra+
gywydaỽl. val|hynn y dyweit seint aỽstin o wedi y pader.
U *al|hynn y|dyweit seint aỽstin o wedi y pader. Maỽr a
ymdiret yỽ y dyn gaffel yr hynn a archo y duỽ. nyt am+
gen dywedut y wedi. yr honn a|dysgaỽd yr arglỽyd iessu grist
y|r ebystyl. Sef yỽ honno. Pater noster qui es in celisPa|beth
ny rodei ef o|e veibyon o|r hynn a|erchynt idaỽ. yr hynn a ryd
ef ynni yn bot yn veibyon idaỽ ef. kanys mỽyaf yỽ ynni yn
gỽneuthur yn ueibyon idaỽ|ef. a hynny a|w·neir trỽy ˄gred a y bedyd
yr hỽnn a gymerth nerth o|diodeifyeint un mab duỽ. kynno
hynny yd oedem ni baỽp ohonam yn veibyon bar ac irỻoned
o achaỽs pechaỽt adaf ac eua. Ac ỽrth hynny yd archỽn ni arch
dylyedus y|n|tat a ninneu yn ansaỽd iaỽn gobeith yỽ gennym

 

The text Pwyll y Pader, Awstin starts on line 17.