Breudwd Rhyddiaith Gymraeg 1300-1425
English

LlGC Llsgr. Llanstephan 27 (Llyfr Coch Talgarth) – tudalen 36r

Ymborth yr Enaid

36r

ryỽ savỽrber blas a|chweith arnunt. hyt nat oed na sugyr
na|blensbỽdyr. na mel kynteit. na gỽin claret a|e kyffelypei.
a|r rei hynny a|elwit gỽrychyon serch yr yspryt glan. Ac yn
y ỻe y syrthynt yng|kaỻonneu y ffydlonnyon. ỻosgrach o
annwylserch garyat yr yspryt glan a|wneynt. Ac odyna
yn|y byrgrỽnn destlus eneu yd oed man wynnyon danned
ambeỻyon. myỽn gloeỽgochyon orchyvaned ynghylch ta+
uaỽt araf·ber huolder ymadraỽd. ac is·laỽ y byrgrỽnn e+
neu gỽedeid. yd oed elgeth gronn gaboleit wastatlevyn. ac y+
dan hynny mỽnỽgyl kylchaỽcwynn hirlỽys. ac y·dan hynny
hirwynnyon wedeidlun vreisgyon vreichyeu ỽrth gyngryn+
nyon ysgỽydeu arwreidweith. Ac odyna dỽylaỽ hirwynnyon
kan·neitlathyr. a byrryon ewined baỻasar kỽrteissyon. ar
hirwynnyon vyssed anueidraỽl disgleirloeỽ lewychder. ac
ardyrchafyat dwy·vronn vilỽryeid. a chorff ỻeweid ardercha+
ỽc. ac am y arch yn aduein vonhedigeidlun. Ac odyna bras+
wynnyon vordwydyd kadyrweith. a chyngrynnyon linnyev
y·ryngthunt. a|hirwynnyon unyaỽnỻun esgeireu kyflad+
lun. dyeithyr bot yn vreisgach y crotheu udunt yn agos y|r
glinyeu noc eu meined. ac y·dan hynny tyneryon hirwyn+
nyon draet. a chyngrynnyon vyssed arnunt gỽynn+|destlusy
on. Ac odyna tynerder yr|hoỻ ysprydaỽl gnaỽt desolus*+
lathyr kymeredic o|r yspryt glan. a gỽynvydic anedic o veir
wyry yn kyflenwi kyfladyat pob ffydlaỽn gnaỽt ac ef o
dra·gywydaỽl garyat annỽylserch. Ac am y mab sercha+
ỽcvryt hỽnnỽ yd oed y kyfryỽ wisc honn. nyt amgen. peis
a hossaneu o|r ystinos teneu claerwynn. sef yỽ yr ystinos.