Breudwd Rhyddiaith Gymraeg 1300-1425
English

LlGC Llsgr. Llanstephan 27 (Llyfr Coch Talgarth) – tudalen 25v

Ystoria Lucidar

25v

ac anghytuundeb y·ryngthunt a phob creadur. a megys y
dyrchefir y rei hynn o oruchaf aỻu. veỻy y|gostyngir y ỻeiỻ
o|r an·aỻu mỽyaf. a megys y dyrchefir y rei hynn o|r|anryded
mỽyaf. veỻy y gostyngir y ỻeiỻ o|r amarch mỽyaf. a megys
y ỻawenhaa y rei hynn o arderchaỽc dibryderỽch. veỻy yd
ergryna y ỻeiỻ o vỽyaf aryneic. a megys y byd y rei hynn
yn kanu o dywededic lewenyd. veỻy yd uttaf* y ỻeiỻ o|r trist+
ỽch truanaf heb drangk heb orffen. Cas duỽ a gaffant
am geissyaỽ ỻesteiryaỽ adeilyat y dinas ef hyt y geỻynt.
a chas yr engylyon am lesteiryaỽ cỽplau eu rif hyt y gaỻ+
assant. a|chas y nef newyd a|r daear newyd a phob creadur
am lesteiryaỽ gỽeỻau eu hansaỽd tra|e gaỻassant. a chas
yr hoỻ seint am lesteiryaỽ udunt eu|ỻewenyd tra|e gaỻassant.
Ryued yỽ eu gỽrthỽyneb. megys na eỻir na medylyaỽ na  ̷
chredu meint ỻewenyd y rei uchot. veỻy ny eỻir kyffely+
bu na thraethu meint poeneu y eiỻ. ac am hynny y gel+
wir ỽynt yn gyvyrgoỻedigyon. am eu dy·gỽydyaỽ y ỽrth vuch+
ed duỽ. discipulus Ny dyaỻaf|i hynny. Magister Pan adeilyaỽd duỽ neu+
ad vrenhinaỽl idaỽ y ỻithraỽd y paret pan|dygỽydyaỽd yr
engylyon. a phan vynnaỽd y gyweiryaỽ yd anuones y vab
y gynnuỻ y mein byỽ y|r adeilyat hỽnnỽ. ac esgynnu yn|y
gerbyt a|wnaeth ef. a dwyn y myỽn attaỽ lawer o vein. ac
adaỽ y rei a|dygỽydaỽd. Y kerbyt yỽ y pedwar angel ystor.
a|r ebysytl yỽ y mein a|dynnassant yndaỽ y grist oc eu pre+
geth ar hyt y byt. ac a|gynnuỻassant lawer o vein y adeilat
y duỽ. Y rei a|dygỽydaỽd o|r kerbyt hỽnnỽ ynt y dynyon ny
chrettont yn iaỽn. megys y dywedir. wynt a aethant y ỽrthym
ni.