Breudwd Rhyddiaith Gymraeg 1300-1425
English

LlGC Llsgr. Llanstephan 27 (Llyfr Coch Talgarth) – tudalen 19v

Ystoria Lucidar

19v

megys* ew·yỻys dyn y wneuthur da neu drỽc. a|hynny nyt am+
gen y dyuot pob peth o|r a|wnel dyn rac ỻaỽ. Magister Duỽ a|e gỽyr
ac a|dywaỽt y proffỽydi y gỽneit. ac ny ossodes duỽ anghenre+
it o|r byt y hynny. namyn dynyon e|hunein a|ossodassant udunt eu
hanghenreit pan wnaethant eu hewyỻys o gỽbyl. discipulus A daỽ dim
o damchwein. Magister Na|daỽ. namyn pob peth o lunyaeth duỽ. discipulus
Pa delỽ y ỻosgant yr eglỽysseu neu adeilyadeu megys o damchỽ+
ein. Magister Nyt dim damchwein. yscriuennedic yỽ. Ny byd dim ar
y daer heb achaỽs idaỽ. ỽrth hynny amlỽc yỽ na losgir ac na
distrywir nac eglỽys na thy yn|y byt onyt trỽy y varnu o
duỽ yn gyntaf. ef a|damchweinya hynny heuyt o tri achaỽs.
kyntaf yỽ o|r adeilir drỽy da a geissyer ac a|amlyner ar gam.
Eil yỽ os y neb a|e kyfanheda. a|e helyc drỽy aflanweithrỽyd ac
ysgymundaỽt. Trydyd achaỽs yỽ os y perchennogyon a|e kar+
ant yn vỽy no phebyỻeu tragywydaỽl. ac ny byd marỽ y ỻỽdyn
ỻeiaf y dyn. ac ny byd claf onyt trỽy y beri o duỽ. discipulus Os ang+
eu neu glefyt yssyd boeneu y bechaỽt. paham y godef yr ys+
grybyl y poeneu hynny pryt na|wypont synnwyr y bechu. Magister
Drỽy y rei hynny y poenir dyn pan dristaer o|e dolur ac o|e
hangenn. ef a|digaỽn hynny vot am yr aniueilyeit dof. discipulus Beth
a|dywedy ditheu am y rei gỽyỻt. Magister Yr heint a vo arnunt a|dam+
chweina udunt o|r awyr ỻygredic. neu o achaỽs petheu ereiỻ
gỽrthỽyneb a|damchweinont o bechaỽt. discipulus Beth yỽ hynny. Magister Rac
anuonedigaeth duỽ. y ỻunyaeth a|wnaeth duỽ e|hun. gỽneuthur
y byt y drossi rei o deyrnas nef. ac ny dichaỽn neb onadunt
vynet yng|gyfyrgoỻ. ac yssyd reit eu gỽneuthur oỻ yn iach.
discipulus Ony dichaỽn neb onyt y rei da vot yn iach Paham y creỽyt