Breudwd Rhyddiaith Gymraeg 1300-1425
English

LlGC Llsgr. Llanstephan 27 (Llyfr Coch Talgarth) – tudalen 159r

Gwaeau

159r

G *wae ef dyn caru dyn araỻ. a|gỽir duỽ yn|y garu ef
ac ny char ef duỽ. Gỽae ef dyn chwenychu da dy+
gỽydedic. a theyrnas nef yn adawedic idaỽ. ac na|cheis y henniỻ.
Gwae ef dyn ystyryeit tan teruynaỽl yma. ac na medylya
am y tan ny deruyd vyth. Gwae ef dyn a vedylya am y
peunydolyon nosseu a daruydant. ac na ffy rac y tywyỻ+
ỽch ny deruyd vyth. Gỽae ef dyn gỽelet dynyon meirỽ
ac nat oes arnaỽ ef ouyn y uarỽ. Gỽae ef dyn ystyryeit
oeruel Jaaỽl yma. ac nat aruthrockaa yr oeruel mỽyhaf
yssyd yn|ỻe araỻ. Gỽae ef dyn gỽarandaỽ geireu dynyon
ac na warendeu geireu duỽ. Gỽae ef dyn gỽneuthur idaỽ
kyueiỻyon bydaỽl ymlaen gỽneuthur y gedymdeithas ac
engylyon nef. Gỽae ef dyn heu ỻawer o tired. ac na hea
kardodeu yr|enniỻ teyrnas nef. Gỽae ef dyn a vynych we+
diei. ac nyt ymgyfyiaỽnhaa e|hun o|e dryged. Gỽae ef dyn
credu atgyuotedigaeth y bobyl dyd·braỽt. ac na byd arnaỽ ef
o·vyn y varnu. Gỽae ef dyn gỽybot ewyỻys y arglỽyd duỽ ef.
ac na medylya am y poeneu a|del y dyn am y bechodeu. Gỽae
ef dyn gỽneuthur y petheu a|wnelont afles. ac na|s kyffessa
y rei a|aỻer madeueint idaỽ amdanunt. Gỽae ef dyn chỽen+
nychu enryded bydaỽl. ac na chwennych ỻewenyd nefaỽl.
Gỽae ef dyn adolỽyn trugared gan|duỽ. ac na madeuo ynteu
ynteu y ereiỻ y kameu a|wnelont yn|y erbyn. Gỽae ef dyn
a|darỻeei kyfreitheu duỽ am y|byt. ac a|wrthỽynepei o|e|gof
am y drugared. Gỽae ef dyn a bregethei y ereiỻ gỽirioned
a chyfyaỽnder. ac nyt ymgospo e|hun o|e bechodeu. Gwae ef dyn
a|adnapei bop peth destlus o|r byt. ac nat enrydedei y arglỽyd duỽ.

 

The text Gwaeau starts on line 1.