Breudwd Rhyddiaith Gymraeg 1300-1425
English

LlGC Llsgr. Llanstephan 27 (Llyfr Coch Talgarth) – tudalen 141v

Purdan Padrig

141v

drannoeth diheu oed y goỻi. a|r prior kayet y drỽs heb
ym·geis a|r dyn vyth.  ~ ~ ~   ~ ~ ~  
A C yn yr amseroed hynn yma y|n hoes ni hagen y
damchweinaỽd o rat kyffes. dyuot marchaỽc y
ystyphan vrenhin. nyt amgen owein varchaỽc att yr es+
gob yr oed y purdan yn|y esgobaỽt y gyffessu. A|phan ytto+
ed yr esgob yn angreithaỽ y marchaỽc hỽnnỽ am y becho+
deu. ac yn|dywedut codi duỽ ohonaỽ yn orthrỽm. Ynteu a
dodes ucheneit o gỽbyl ediuarỽch y gaỻon. ac a|dywaỽt y
gỽnaei ef benyt dros y bechodeu herwyd ewyỻys yr es+
gob. A|phan yttoed yr esgob yn gossot penyt arnaỽ herỽyd
messur y pechodeu. y marchaỽc a|dywaỽt. Kann|gỽneuth+
um i godyant y duỽ kymeint a hynny. minneu a|gymeraf
benyt a vo trymach no|r hoỻ benytyeu ereiỻ. gan dy gyngor
di mi a|af y burdan padric. megys y haedỽyf caffel madeu+
eint o|m|pechodeu. Yr|esgob ynteu a|annoges idaỽ ef nat elei
y|r penyt hỽnnỽ. Ny chytsynnyaỽd y marchaỽc gỽraỽl ac
annoc yr esgob am beidyaỽ. Yr esgob a dywaỽt idaỽ ef ry
goỻi ỻawer yno y geissyaỽ y ymchoelut ef y ỽrth y penyt
hỽnnỽ. ac ny aỻaỽd ef plyc ar y|marchaỽc yr ouyn y penyt
hỽnnỽ. Yr esgob a|gynghores idaỽ ynteu kymryt abit my+
neich neu ganonwyr. Y marchaỽc a|dywaỽt na|s kymerei
yny elei y|r purdan kysseuin. Yr|esgob a|weles gỽastatrỽyd
y ediuarỽch ef. ac a|e hanuones att brior y ỻe hỽnnỽ a
ỻythyr ganthaỽ y erchi y oỻỽng y|r purdan herwyd de+
uaỽt y rei a benyttyynt. A|phan|doeth ac adnabot o|r pri+
or y neges. ynteu a datkanaỽd idaỽ ef y perigyl a|daroed