LlGC Llsgr. Llanstephan 27 (Llyfr Coch Talgarth) – tudalen 121v
Efengyl Nicodemus
121v
eu rỽymeu. A phaỽb o|r a notteynt ucheneityaỽ yn carchar
ni yr|aỽrhonn y neityant y gennym. ac oc eu gỽedieu ỽy
y gỽrthỽynebir yn pendeuigaeth ni. Trỽy yn teyrnassoed ni
y kerdant ỽy. ac nyt oes arnunt dim o|n hovyn ni. Ac y+
gyt a|hynny bygỽth kadarn a|wnant arnam y rei ny bu+
ant veilch eiryoet. O sathan dywyssaỽc tat yr hoỻ dryged
pa beth a vynnassut ti y|wneuthur. kanys y rei a uuant
anobeith yr dechreu byt hyt yr aỽr·honn o Jechyt. yr aỽrhonn
y kaỽssant eu bywyt. Ny chlywir kỽynuan neb o·nadunt
yr aỽrhonn ual y gnotteynt. nac un duchan. na deigyr ar
eu grud ny welir na|e ol. O|sathan dywyssaỽc perchennaỽc
agoryadeu y deu olut a|geissyeist di trỽy dorri kymenediỽ+
eu am ffrỽyth y prenn. a choỻi paradwys. yr awrhonn y co+
lleist ditheu drỽy brenn y groc. A phan|grogeist di yr iessu
grist hỽnn yma. y|th erbyn dy hun. ac y|m|herbyn nineu y
gorugost. kanys o hynn aỻan ti a|adnabydy pa ryỽ boeneu
anheruynedic a odefych y|m tragywydaỽl geitwadaeth i. O
sathan dywyssaỽc aỽdur angeu. a dechreu syberỽyt ti a|dyly+
assut geissyaỽ achaỽs yn erbyn y neb ny chefeist neb·ryỽ
gared arnaỽ. Pa rac y ỻefesseist di heb neb·ryỽ dylyet y
grogi ef yn ennwir. a|e dỽyn yn wirion diargywed y|n te+
yrnas ni. ac o hynny y kolleist ditheu a|gỽirion ac ennw+
ir. a|r hoỻ vyt. A gỽedy dywedut o vffern ỽrth sathan. y dy+
waỽt brenhin y gogonyant arglỽyd y kyuoetheu ỽrth
uffern. Ef a vyd sathan tywyssaỽc y·dan dy uedyant
ti yn ỻe adaf a|e blant a|e hoỻ werin. ac ar hynny estynnu
y laỽ a|dywedut. Deuỽch attaf|i vy seint a phaỽb o·honaỽch
| « p 121r | p 122r » |