Breudwd Rhyddiaith Gymraeg 1300-1425
English

LlGC Llsgr. Llanstephan 27 (Llyfr Coch Talgarth) – tudalen 121r

Efengyl Nicodemus

121r

a|th echtywynnedic leuuer. Ac yn un agỽed a|hynny y ỻefassant
hoỻ uydinoed y dieuyl y·gyt yn|dechrynedic o ovyn. a chan ovyn+
aỽc darestyngedigaeth dywedut. Pa vn wyt ti Jessu. mor ga+
darn ỽyt ac amlỽc. mor eglur ỽyt heb uann arnat. ac mor
lan o neb·ryỽ gared. kanys y byt daearaỽl a vu darestyng+
edic ynni yn wastat hyt hynn. ac a oỻyngei eu teyrnget+
oed y|n haruer ni. nyt anuones ef eiryoet ynni y ryỽ dyn
hỽnn yn uarỽ. nyt anuones duỽ heuyt eiryoet y seint y
ryỽ anregyon hynn. ac ỽrth hynny duỽ ỽyt ti pan gyrch+
ych yn|teruyneu ni mor diergryn a hynny. heb aryneigy+
aỽ yn poeneu ni. ac y·gyt a|hynny dỽyn paỽb o|n karchar
ninneu. Agattoed ti yỽ yr Jessu hỽnnỽ. o|r hỽnn y dywaỽt
sathan yn tywyssaỽc ni panyỽ. trỽy dy angeu di a|th groc
y kaffut uedyant yr|hoỻ uedyssyaỽt. Ti yỽ brenhin y go+
gonyant. ac arglỽyd hoỻgyuoethaỽc yn sathru angeu. ac
yn daly sathan dywyssaỽc. ac yn|y garcharu o gadwyneu
tanaỽl. a|e rodi yn uffern o|e boeni. ac y dyrchafaỽd y rei
eidaỽ y eglurder e|hun. Ac yna yd edrychaỽd uffern ar
sathan. a|dywedut ỽrthaỽ gan y angreithaỽ yn|diruaỽr. O
dywyssaỽc. kyuyrgoỻ. keỻweir a gỽattwar yr engylyon. gỽr+
thmuni y rei gỽirion. pa beth a vynnassut ti y wneuthur
am vreinhin* y gogonyant. yn|y vynedyat ef y angeu y
mynneist di y grogi ef. ac o hynny yd edeweist di ỻawer
o yspeileu. Pony wybuost di ynuyt pa beth a|wnaethost.
ỻyma yr Jessu hỽnnỽ yn tywynnu o echtywynnedigrỽyd
y dwywolyaeth ef. Ef a ffoes racdaỽ hoỻ dywyllỽch ang+
eu. a|charchareu uffern ry dorres. a rydhau y keith oc