Breudwd Rhyddiaith Gymraeg 1300-1425
English

LlGC Llsgr. Llanstephan 27 (Llyfr Coch Talgarth) – tudalen 112r

Efengyl Nicodemus

112r

dỽyn Jessu rac y vronn y|r vraỽtle. ac yna rodi braỽt yn|y erbyn
a|dywedut. dy genedyl di dy hun a|th gytbroues ual yn vrenhin.
ỽrth hynny y gorchymynnassant vinneu yn gyntaf dy ffroỽ+
yỻaỽ di herỽyd gossodeu y tywyssogyon kyntaf. Odyna y gor+
chymynnaỽd y dyrchafel myỽn y groc. Ac yna y tynnỽyt deu
leidyr y·gyt ac ef. gismas. a gesmas. ac y doeth iessu a|r deu lei+
dyr y·gyt ac ef aỻan o|r dadleudy. A|gỽedy eu dyuot y|r ỻe yspe+
ilaỽ Jessu o|e diỻat a|ỽnaethant. a rỽymaỽ ỻenỻiein ym·da+
naỽ. a rodi coron o drein yspydeit am y benn. A gỽedy y wa+
radwydaỽ ueỻy y grogi yn|y groc a|r deu leidyr y·gyt ac ef.
gismas o|r|tu deheu. a gesmas o|r|tu assỽ idaỽ. Ac yna y|dywaỽt
Jessu. O dat madeu udunt kanny wdant beth a|wnant. a|bỽ+
rỽ prenneu am y diỻat a|orugant. a thywyssogyon yr offei+
reit yn|y wattwaru y·ryngthunt e|hunein. ac yn dywedut. Ere+
iỻ a|wnaei ef yn iach ac ny dichaỽn y wneuthur e|hun. Ymw+
naet yn iach os mynn. os mab y duỽ yỽ ef disgynnet e|hun
o|r groc. A|r marchogyon heuyt a|oed yn|y wattwaru. ac yn
kynnic idaỽ gỽin chỽerỽ gỽedy y gymysgu a bystyl y yuet.
A dywedut ỽrthaỽ. os tydi brenhin yr idewon ymrydhaa dy
hun. a marchaỽc longius y enỽ a rỽygaỽd y ystlys a|gleif
ac a|e hagores. ac y|doeth o|e ystlys gỽaet a dỽfyr. ac erchi a
oruc y raclaỽ dodi uch y benn yn|y groc y tittyl a ysgriuen+
nassei ef e|hun. o lythyr efrei. a|groec a|ỻadin. herỽyd ual y
dywedassei yr Jdewon. hỽnn yỽ brenhin yr Jdewon. Ac yna y
dywaỽt gesmas un o|r ỻadron a dodassit y·gyt a Jessu ar y groc.
Os tydi crist heb ef rydhaa ni a|thi. a gismas a|e hattebaỽd
ynteu ac a|dywaỽt. Nyt oes arnat ti ovyn duỽ a|thi y|nghyf+
yrgoỻ.