Rhydychen, Llsgr. Coleg yr Iesu 57 – tudalen 57
Llyfr Blegywryd
57
yng|kyfreith ruuein y keffir. y ỻe nyt enwer rif
tyston. digaỽn yỽ deu dyst. Y gyfreith honn a
dyw* nat kỽbyl tystolyaeth un tyst. ~ ~ ~
N aỽ nyn a|gredir pob un yn dỽyn eu
tystolyaeth gan tyngu. kyntaf yỽ. ar+
glỽyd rỽng y deuwr trỽy na bo ef yn gyfran+
naỽc ar y dadyl. neu ar yr hynn y bo am·danaỽ.
ac adef o|r gỽyr ry uot y gynnen yn|y wyd kyn
no hynny. ac na bont vn duỻ. ac o|r gỽatta vn
yn erbyn y ỻaỻ. dir yỽ idaỽ tyngu yng|gỽyd
yr arglỽyd. Yspeit naỽ nieu a|geiff arglỽyd
am y lỽ y vedylyaỽ pa vod y tyngho. Oet yssyd
y offeiryat am y lỽ. hyt yr amser y gaỻo canu
offeren gyntaf. Eil yỽ. abat rỽng y deu vy+
nach. Trydyd yỽ tat rỽng y deu uab gan
dodi y laỽ ar benn y mab y tyngho yn|y
erbyn. a|thyngu ual hynn. Myn duỽ a|m
creaỽd o dat. a|thitheu o·honaf inneu. gỽir
a dywedaf y·rot ti a|th vraỽt. Pedwyryd yỽ.
braỽdỽr y·rỽng deu·dyn a|vont yn amrysson
| « p 56 | p 58 » |