Rhydychen, Llsgr. Coleg yr Iesu 57 – tudalen 43
Llyfr Blegywryd
43
ygyt ac ef a tyngo yn|erbyn pleit clybot a|gỽybot
arnei y ỻedrat. Eil yỽ tyngu o|r managỽr gỽelet
a gỽybot arnaỽ y ỻedrat. a|hỽnnỽ a|elwir ỻiỽ. Try+
dyd yỽ ỻudyas rac dyn keissyaỽ y da a goỻassei
yn|y ỻe y tebygei y vot. Ny|dyly mynet reith
gỽlat ar neb am ledrat heb vn o|r manageu
hynny yn|y erbyn o·nyt paỻu a|wna o lỽ gỽei+
lit y|r coỻedic. o|r paỻa nyt reit manac ar+
naỽ namyn hynny y gymeỻ reith gỽlat y
ganthaỽ. dy·eithyr perthynu kadarnhau y
paỻedigaeth trỽy gof. O|r gỽedir haỽl a def+
nydyer o amryuaelyon achỽyssyon. drỽy vn
reith a berthyno ỽrth yr achaỽs mỽyaf ohonei
y gỽedir yr haỽl oỻ. kanys pop vn haỽl vu re+
ith a|dyly yny gỽatter. a hynny ỻe ny mettrer
diffodi haỽl drỽy amdiffyn. neu o·blegyt ryỽ
eisseu. Pỽy bynnac o|r kynhennwyr yn ỻys a
el yn|erbyn datkan braỽdỽr kynn barn ef a|dy+
ly gaffel cof trỽy dỽng y·rydaỽ ac ef kynn bar+
no dim. Tri pheth a|dyly braỽdỽr eu datkanu
| « p 42 | p 44 » |