Rhydychen, Llsgr. Coleg yr Iesu 57 – tudalen 227
Llyfr Blegywryd
227
att yr yngneit. a|datcanent y|r yngneit eu
kynghor. O deruyd na|bo reit ỽrth y geir ky+
uarch. Jaỽn yỽ gadel udunt eu hardelỽ. a
gyrru deuwr y ovyn pỽy yỽ y gỽybydyeit
a keitweit. a pha le y maent. o|r dywedant
eu bot yn|y maes. mỽynhaer ỽynt. Os yn vn
gymỽt ac ỽy y dywedant eu|bot. roder oet
tridieu udunt. Os y|nghymỽt arall. roder
oet naỽ nieu udunt. Os yng|gỽlat araỻ. ~
neu vot ỻanỽ neu trei y·ryngthunt ac ỽy.
oet pythewnos o|r|dyd hỽnnỽ os kynn hanner
dyd vyd. os gỽedy hanner dyd vyd. pytheỽ+
nos o drannoeth. a|r dyd hỽnnỽ. dyd coỻ neu
cael. a|bot y gỽystlon yng|karchar y brenhin
hyt y|dyd hỽnnỽ. ac erchi y baỽp dyuot y
dyd hỽnnỽ a|e defnydyeu ganthaỽ hyt ar y
tir. kyny bo duun rỽng y dỽy bleit hynny
neut y·diỽ yn|dyd. kyfreith. varnedic. Yn|y trydyd
dyd gỽedy deler wyneb yn|wyneb. iaỽn yỽ y
baỽp eisted yn|y le ual yd eistedaỽd gynt. Ac
o|r byd meirỽ neb o|r|a|vu yn|y ghaỽssed* gynt.
| « p 226 | p 228 » |