Rhydychen, Llsgr. Coleg yr Iesu 57 – tudalen 22
Llyfr Blegywryd
22
dadleuoed. ac y vot y·gyt ac ygneit ỽrth rodi
barneu. ac y warandaỽ amryssoneu. Ot
anuonant att y brenhin yr hynn a vo pe+
trus ganthunt. ac a vynnont drỽydaỽ yn+
teu y amlyckau. gỽnelynt ueỻy trỽy y vlỽ+
ydyn gỽbyl. Odyna y dyly caplan y brenhin
y dỽyn ef y|r eglỽys. ac y·gyt ac ef y deudec sỽ+
ydaỽc arbennic ỻys ỽrth offeren. a gỽedy of+
feren ac offrỽm|y gan baỽp. paret y caplan
idaỽ tyngu ar y creir. ac ar yr aỻaỽr na varno
cam·varn vyth hyt y gỽypo. nac yr adolỽyn
neb. nac yr gỽerth. nac yr caryat. nac yr cas
neb. Gỽedy hynny deuent ygyt att y brenhin
a|dywedent yr hynn a|wnaethant amdanaỽ.
ac yna y dyly y brenhin rodi y sỽyd idaỽ o|r byd
bodlaỽn idaỽ. a|e lehau myỽn eistedua dylye+
dus idaỽ. Ac yna y|dylyir rodi ouer·dlysseu
idaỽ. Taỽlbort y gan y brenhin. a modrỽyeu
eur y gan y vrenhines. ac na rodet ac na wer+
thet ef y rei hynny vyth. Ny dyly bot yn
| « p 21 | p 23 » |