Breudwd Rhyddiaith Gymraeg 1300-1425
English

Rhydychen, Llsgr. Coleg yr Iesu 57 – tudalen 155

Llyfr Blegywryd

155

chenedyl. y plant a enniỻo o hỽnnỽ ny chaf+
fant rann o tir y|gan genedyl eu mam herỽyd
kyfreith O|r dyry rieni neu genedyl gỽreic dlaỽt
y aỻtut. plant honno o|r aỻtut a|gaffant rann
o tir gan genedyl eu mam. ac ny cheiff un oho+
nunt eistedua arbennic hyd y dryded ach. ac o
ry* gyniwedi honno y|nescir gỽarthec diuach y
talu dros alanas. ac ny dylyir mechni drostunt
o|r mod hỽnn. Os yr aỻtut o|r wreic honno a|lad
dyn. kenedyl y uam a dal y ỻadedic. kanyt oes
genedyl y|r aỻtut. y gaỻer rannu galanas ar+
nunt na|e|dial. O|r tyrr ỻong ar dir escob. deu
hanner vyd yr enniỻ rỽng y brenhin a|r escob.
Os ar|dir y brenhin y tyr. y brenhin e|hun bi+
eiuyd yr enniỻ. Beth bynnac a|vỽryo morgym  ̷+
laỽd y|r tir. megys torri ỻong. y brenhin bieiuyd.
Pỽy|bynnac a|omedo sefyỻ ỽrth gyfreith yn
ỻys yng|gỽyd y brenhin anreith odef vyd. Eil
dyn anreith odef yssyd. fflemaỽr. Trydyd yỽ.
dyn a|lado kelein kywlat ac ef.