Breudwd Rhyddiaith Gymraeg 1300-1425
English

Rhydychen, Llsgr. Coleg yr Iesu 57 – tudalen 149

Llyfr Blegywryd

149

etiued o|r tir hỽnnỽ. Megys y mae braỽt yn|eti+
ued dylyedaỽc o dref y dat. ueỻy y mae chwaer
yn etiued dylyedaỽc o|e godaỽl. trỽy yr hỽnn y
kaffei hi wr priaỽt dylyedaỽc o tir. nyt amgen.
y gan y that. neu y gan y chyt·etiuedyon o|r tric
ỽrth gynghor y rieni a|e chyt·etiuedyon. Ony
byd y berchennaỽc tir etiued araỻ mamyn* ~
merch. y uerch a vyd etiued o|r hoỻ tir. O|r byd y
berchennaỽc tir etiued deduaỽl. ac araỻ anedua+
ỽl. y deduaỽl a vyd etiued o|gỽbyl. a|r aneduaỽl heb
rann. O|r byd y berchennaỽc tir etiued dianaf.
ac araỻ anafus. megys daỻ neu vydar. neu
grupẏl. y dianaf a vyd etiued o|r tir oỻ. na|dedua+
ỽl vo nac aneduaỽl. kany dichaỽn neb anafus
wneuthur yn|gỽbyl wassanaeth tir y|r brenhin
yn|dadleu a|ỻuydeu. ac o|r|byd y|r etiued anafus
hỽnnỽ etiued dianaf. hỽnnỽ a vyd etiued o|e dy+
lyet ef. Pỽy|bynnac a|gymero dylyet dyn anafus
o tir. pryderu yr anafus hỽnnỽ a|oruyd arnaỽ.
o vỽyt a diỻat tra vo byỽ ef.  ~ ~ ~