Breudwd Rhyddiaith Gymraeg 1300-1425
English

Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 96v

Buchedd Dewi

96v

uorynyon. eỽch heb hi hyt yr|auon ysyd gerllaỽ y
sant. a|diosgỽch aỽch dillat. Ac yn noeth dyỽed+
ỽch vrthunt geireu aniỽeir kyỽilydus. holl disgy+
blon deỽi a|uu anaỽd gantunt diodef y|kyỽilyd
hỽnnỽ. Ac a|dyỽedassant vrth|deỽi. foỽn odyma
ymeith heb ỽy. ny a|allỽnn ni diodef hynn. nac e+
drych ar|y gỽraged drỽc. Ac yna y|dyỽant y|sant
ponyt gỽell yni peri vdunt ỽy adaỽ y|lle hỽnn.
yni. Ac yna deỽi a|e disgyblon a|dyrỽestassant y
nos honno hyt trannoeth. Tranoeth y|dyỽat gỽr+
eic boya vrth y|llysuerch. tidi vorỽyn heb hi kyuot
ac aỽnn yn dỽy y lyn alun y|geissaỽ kneu. heb y|vor+
ỽyn vrth y|llysuam. paraỽt ỽyf|i. heb hi y|vynet.
A cherdet a|ỽnaethant hyt ygỽaelaỽt y|glyn. A
phan doethant yno eiste a|oruc y|llysuam a|dyỽe+
dut vrth y|llysuerch. dyro dy|benn ym|harffet. mi
a|dihaedaf di benn. Sef a|oruc y|vorỽyn da diỽeir
war gymenn. rodi y|phenn yn arffet y|llysuam. Sef
a|oruc y|llysuam tynnv kyllell a|llad penn y|vorỽyn
santes. Ac yn|y gyfeir y|dygỽydaỽd y|gỽaet yr llaỽr
yd ymdangosses ffynnyaỽn. A|llaỽer o|dynyon a ga+
uas yechyt a gỽaret yno. A|hyt hediỽ y|gelỽir y
ffynnaỽn honno. ffynnaỽn dunaỽt. kanys duna+
ỽt oed enỽ y|vorỽyn. Yna y|ffoes y|llysuam drỽc.
Ac ny ỽybu neb o|r byt hỽnn pa anghev a|e duc.