Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 94v
Buchedd Dewi
94v
ef. ef a|doeth a taraneu a|mellt. a|charrec a|oed gyf+
uerbynn a|phenn nonn a|holltes yny uu yn deu han+
ner. Ac a neidyaỽd y|neill hanner idi dros benn y|llei+
an hyt is y|thraet pann yttoed hi ynn escor. Gỽyrth
arall a|oruc deỽi pann vedydyỽyt. ef a|ymdangosses
ffynnyaỽn o|r dayar lle ny|buassei ffynnyaon eiroet.
A|dall a|oed yn daly deỽi vrth vedyd a|gauas yna y
olỽc. Ac yna y|dall a|ỽybu vot y|mab yr oed yn|y daly
vrth vedyd yn gyfulaỽn o|rat. A|chymryt y|dỽfuyr
bedyd a golchi y|ỽyneb ar dỽfuyr. ac o|r aỽr y|ganet
dall ỽynebclaỽr oed. Ac yna y|olỽc a|gauas a|chỽbl
o|r a|berthynei arnnei. Sef a|ỽnaeth paỽb yna mo+
li duỽ val y|dylyynt. Yn|y lle y|dysgỽyt deỽi yndaỽ a
elỽit. vetus rubus. yng|kymraec yỽ. yr henllỽynn.
yno y|dysgỽyt idaỽ ef seilym yr holl vlỽydynn a|e
llithion ar offerennev. Yno y|gỽelas y|gytdisgy+
blon ef colomen a|gyluin eur idi yn|dysgu deỽi. Ac
yn gỽare yn|y gylch. Odyna yr aeth deỽi hyt at a+
thro a|elỽit paulinus a|disgybyl oed hỽnnỽ y|escob
sant a|oed yn rufein a|hỽnnỽ a|dyscaỽd deỽi hyny
vu athro. Ac yna y|damỽeinaỽd colli o athro deỽi y
lygeit o|dra gormod dolur yn|y lygeit. a|galỽ a|oruc
yr athro attaỽ y|holl disgyblon ol yn ol y|geissaỽ y
gantunt ganhorthỽy am|y|lygeit. Ac nyt yttoed
yr vn yn|y allel idaỽ. Ac yn diỽethaf oll galỽ deỽi a|oruc.
| « p 94r | p 95r » |