Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 82r
Ymborth yr Enaid
82r
yỽ ytti dyall traet y|tat neu yr yspryt glan na|e a*
adnabot. Vrth hynny ymdiryona di yn|garedic ar
mab ac ymgar ac ef. kannys ohonaỽch chỽi yr he+
nyỽ ef. A throssoch y ganet ac y|godeuaỽd. Ac a|ỽn+
nelych di erdaỽ ef kymeredic yỽ gennym ni. Ac
yni y|gỽney megys idaỽ ef kannys vn ym ni ac
ef yn tri ygyt. Ac odyna glutỽediaỽ a oruc y|bra+
ỽt yn serchaỽl garedic y|drindaỽt o nef y|ardan+
gos idaỽ peth cadỽadỽy trigedic yn|y tragyỽydaỽl
gof am|y gỽynnvydedic dỽyỽaỽl vendigeitvab
hỽnnỽ. drỽy ymdiret yn gadarnn yr drindaỽt ar
gaffel y gantaỽ yr hynn a|archer yn|drut idaỽ. ac
yn gyfyaỽn drỽy teilỽg wedi. A gỽedy llithraỽ
talym o amser. ỽedy hynny hyt yny|doeth gỽyl y
drindaỽt yn|yr haf. yna y|boredyd wedy ry|uot y
braỽt yn glutwediaỽ y drindaỽt wedy plegeint
y brodyr yny vu dyd ar braỽt yna ỽedy ry|ollỽng
o|e benyt yr ys talym kynn o hynny. yna y boredyd
y|syrthyaỽd marỽhun ysbrydaỽl ar y braỽt. Ac y+
n|y varỽhun honno ef a|ỽelei herỽyd y|debic ef
vot y byt oll ygyt. ar benn brynn vchel a|phaỽb
yn ergrynnv yr arderchaỽc weledigaeth a|oed yn
dyuot yn ebrỽyd. Ac yna yn|y lle ef a ỽelei y bra+
ỽt y|nef oll yn ymdorri. ac yn|ymegori. Ac ynn
gollỽg o·honei glaerheul anueidryaỽl eglurder
| « p 81v | p 82v » |