Breudwd Rhyddiaith Gymraeg 1300-1425
English

Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 65v

Ystoria Lucidar

65v

dilev na phoener amdanadunt. kannys ỽynt
a|vadeuir drỽy benyt. a chyffes. ac a|dileir o|gyt+
ỽybot duỽ ar seint. Mi a|vynnỽn broui hynny
drỽy angkreifft. Pony ỽdosti ry|lad o dauid ga+
laned. a|e uot yn anniỽeir. Gỽnn. Pony ỽdosti
vot meir vadalen yn bechadures. a gỽadu o be+
der grist o|e anudon. Ac ymlad o|baỽl ac eglỽys
duỽ yn greulon. Gỽnn. a|gredi di eu bot ỽynt
yn|y nef. Credaf. vrth hynny os ti·di yn llygre+
dic etỽa ac yn vreuaỽl a|ỽyr hynny. mỽyhaf oll
y|gỽybydant ỽyntev. ac ỽynt yn ryd o|lygredi+
gaeth. a breuolder di weithredoed ditheu. Ac
ny byd keỽilyd ar neb yr hynny namyn bocsach
gantunt eu diang. A|uyd gỽrthuun gann yr
engylyon neur seint. y|rei a|ỽnaeth petheu dy+
bryt val hynny. Ac a|uyd gỽaeth gantunt ỽy
yr hynny. Na vyd. namyn llaỽen vydant vrth+
unt megys kedymeithon vrth ereill a|diengyt
o|vrỽydyreu o|berigyl arall. Velle y|kytlaỽenhaa
yr engylyon ar seint am eu diang ỽynteu. A
phob peth o|r a|wnnaethost o bechodeu a|drossir
ỽynt yt ar|da. A megys y byd hoff gann vedyc
iachav claf annobeith. velle y|byd gogonnyant
gann duỽ ar seint. ar engylyon eu gỽneuthur
ỽyntev yn yach. Awi o|r diruaỽr leỽenyd.