Breudwd Rhyddiaith Gymraeg 1300-1425
English

Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 4v

4v

Mynych yd erchis vyg|kyt·disgyblonn ymi ellỽg
neb rei o ovynnei bychein vdunt. ac ny elleis i
y|neccau ỽy rac bot yn bechaỽt ym kudyaỽ yn|y
dayar y|sỽllt a orchymynnỽyt ym. yny vo y llaf+
ur hỽnn. yn lles yn yr aỽr honn. ac y rei a|del
yn hol. vrth hynny. Mi a|orchymynnaf ac a ar+
chaf yr neb a|e darlleo. ỽediaỽ duỽ drossof.
Enỽ y|llyuyr hỽnn yỽ lucidar. Sef yỽ hynny. go+
leulyuyr. kanys yndaỽ y|goleuheir amryfualy+
on dyỽyllyon betheu. Ny mynegeis ynhev vy
enỽ vy|hvn rac gỽallygyaỽ y|gỽeithredoed hynn
o gennvigenn. archet hagen y|darlleaỽdyr yscri+
uennv yn|y nef enỽ y|neb a|e gỽnaeth. ac na di+
leer y|enỽo*|o|lyuyr y|uuched. Grỽndỽal y|gỽeith
hỽnn a ossodet ar garrec. Sef yỽ hynny. crist.
Ar holl ỽeith ỽedy hynny. ar pedỽar piler. ar
piler kyntaf a|dyrcheif aỽdurdaỽt y|proffỽydi.
Yr eil a|ỽastatta teilygdaỽt yr ebestyl. Y|trydyd
a|gadarnnhaa yr ysponnỽyr. Y pedỽeryd piler.
a sefuydla kall gyỽreinrỽyd.
Gruffud ap llywelyn ap phylip ap trahayarnn. o kantref
maỽr a|beris yscriuennv y|llyuyr hỽnn. o laỽ
ketymdeith idaỽ. nyt amgen. gỽr ry|oed agkyr
yr amsser hỽnnỽ yn llandeỽyureui. y rei y|med+
dyanho duỽ y heneideu yn|y drugared. Amen.
anno domini.mCCC. Quadragesem Sexto~