Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 40v
Ystoria Lucidar
40v
glỽyd ỽynt drỽy y|diffeith yn hir o amser. Ach+
os arall uu pobyl yr ideỽon oed gyscot. Ac eilun
pobyl gristonnaỽl. Ac velly y|raculaennaỽl kys+
gaỽt y|gỽir aberth yn|yr oen pasc. neu yn|y llo
coch. neu yn|y boỽch. pann doeth crist hagen y
gỽr yssyd wironed y|rodi y|venndith. a dedyf.
y|teruynnaỽd ar|y kyscaỽt hỽnnỽ. Ac a|e|ymro+
des e|hun yn aberth gỽahanredaỽl y|dỽyn pech+
odeu. Pryt nat anrydedei y|gỽyr gynt onnyt
yr un duỽ yn|y dechreu. paham y|dechreuassant
ỽy diỽyll y|geudỽyeu. Ef a|dyỽedir y|mae yma+
bel tỽr y keỽri y|dechreỽyt hynny yn gyntaf.
ef a|dyỽedir bot yn|y uchet pedeir milltir ar|hu+
geint. Ac yno y|bu y|brenhin kynntaf o|r byt
hỽnn uonebroth y enỽ. Ac a|wnnaeth delỽ belo
y|dat. A|chymell paỽb o|r a|oed darystegedigyon
idaỽ o|e adoli. Ac ereill o|ymgyffelybu ac yntev
a|wnaethant geudỽyeu yr brenhined a vei ge+
reint vdunt. A chymell y|bopyl o|e adoli megys
y|gỽnaeth gỽyr creta y iubiter. A gỽyr athenas
y cycropus. Ar latinyeit y Janus. A gỽyr rufe+
in y romulus. Ofuyn gynntaf a|beris y|geu dỽy+
eu yn|y byt. med horas. A|chythreuleit a|eint
yn|y delỽeu hynny. Ac a|dỽyllỽyt y bopyl gann
rodi attebyon vdunt a|gỽatỽar amdanunt.
| « p 40r | p 41r » |