Breudwd Rhyddiaith Gymraeg 1300-1425
English

Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 130v

Breuddwyd Pawl

130v

pedỽar kythreul. Ac ynn yntev yn|ỽylyaỽ ac yn
vdaỽ. A|phaỽl a|ovynnaỽd pỽy oed hỽnnỽ. Escob
gỽallus heb yr anghel yỽ. ny chedỽis kyureithev
duỽ. ac ny bu diỽeir o eir nac ỽeithret na medỽl.
namyn kebyd tỽyllỽr. a cham·ryuygus. Ac am
hynny y|byd arnnaỽ yntev anneiryf o|boenev
hyt dydbraỽt. Ac yna y|dyỽat paul. och. och. och.
gỽae ỽynt y|pechaduryeit y|geni. Ac yna y|dyỽat
yr angel vrth baỽl. paham yd ochy di paỽl. ny
ỽeleiste eto nemaỽr o boenev vffernn. Ac yna dan+
gos pydeỽ a|oruc idaỽ. a|seith ynseil arnaỽ. Saf
o bell heb yr angel. kanny elly diodef dereỽant y
pydeỽ hỽnn. A|phann agoret genev y|pydeu. ef a
gyuodes dreỽant ohonaỽ. val y|tybygei baỽl y
vot yn ỽaeth no holl boenev vffernn. Pỽy|byn+
nac heb yr angel a|dygỽydho yn|y pydeỽ hỽnn.
ny byd cof ef byth gyr bronn duỽ. Y|rei hynny heb
yr angel ny credassant ygrist y|gỽr a|diodefaỽt ang+
hev yr pobyl y|byt. Ac ny chredassant kymryt o+
honaỽ gnaỽt dyn. na eni o veir ỽyry. ac ny chym+
erassant vedyd yn enỽ duỽ. Ac ny thalassant ỽy
degemhev yr eglỽyssev. Ac a|trymygassant y kyf+
nesseiueit. Ac ny chymerassant gymvn o|gorff
crist na|e|ỽaet. Odyna y|gỽelas paỽl gỽyr a|gỽra+
ged yn noethon a|phryfet. a nadred yn|y bỽyta.