Breudwd Rhyddiaith Gymraeg 1300-1425
English

Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 113r

Ystoria Adrian ac Ipotis

113r

Hynn a|dichaỽn vot yn ỽir oll. Am dyỽedut pỽy yỽ
y|gỽr ny anet ac a|uv varỽ. y|mab a|dyỽat y|mae
adaf a|rodes duỽ idaỽ vyỽyt ym paradỽys. ac
a|e gỽnaeth o|e laỽ e|hun. yr amheraỽdyr yna
a|ofuynnaỽd trỽy leỽenyd yr mab. Jpotis a|ỽyd+
dat ef by saỽl amryfal defnyd y gỽnaethpỽyt
dyn ohonunt. y|mab a|dyỽat y|mae seith def+
nyd. nyt amgen. Prid. A dỽfyr. A mor. o|r heul ar
. gỽynt. Ar aỽyr. Ac o|r mein gyr llaỽ y
mor. a heuyt o|r yspryt glan. O|r prid y|gỽnaeth+
pỽyt knaỽt dyn. Ac o|r dỽfyr y|ỽaet. Ac o|r he+
ul y|gallonn a|e yspeil. y ỽaredogrỽyd a|e gam+
peu da. Ac o|r aỽyr y|synnỽyr. Ac o|r gỽynt y
anadyl. Ac o|r mein y esgyrnn. Ac o|r yspryt glan
y gorucpỽyt y eneit. Ar neb a|uo ragor gantaỽ
o|r dayar. amdrỽm diaỽc gystudedic vyd herỽyd
anyan daeraỽl. Ac amdrỽm y|vedỽl a|e ỽeithret.
Ar neb a|uo mỽyhaf y defnyd yndaỽ o|r dỽfyr
moraỽl. a|uyd llafuryus trabludyus gyghoruyn+
nus chỽenychus am tir a|dayar a golut bressen+
naỽl. a|hynny a|vyd palledic idaỽ vrth y|reit a|e
diỽed. o achos vot yn kynnhebic golut dayara+
ỽl y lanỽ a|threi herỽyd anỽadalrỽyd. pỽy|byn+
nac a|uo yndaỽ y|defnyd mỽyhaf o|r gỽynt. ef
herỽyd anyan a|uyd amyskaỽn a|gorỽyllt yn|y