Breudwd Rhyddiaith Gymraeg 1300-1425
English

Rhydychen, Llsgr. Coleg yr Iesu 111 (Llyfr Coch Hergest) – tudalen 222v

Ystoria Bown de Hamtwn

222v

894

a|rodes. ef a|ladaỽd iuor o|r gris. ac abat
o uỽrri. A phan daruu idaỽ ỻad yr abat.
y brathaỽd y uarch. a|sabaoth a|e wyr
gyt ac|ef. ac yna y|buant laỽen. ac y by+
gylaỽd neb o·nadunt yn|y ỻe y bei. Ac yna
yd arganuu boỽn yr amheraỽdyr. ac y
ỻawenhaaỽd trỽy ewyỻys drỽc. a dywedut
ỽrthaỽ. Myn|duỽ draetur os tydi a|dieinc
a|th vywyt gennyt odyna. nyt atto duỽ
y mi uynet odyma ony chaffaf dy benn
di yr maỽr. Ac yna y|dywaỽt yr amher+
aỽdyr ỽrth boỽn. ti lỽttỽn pỽy a uegythy
di mor gadarn a hynny. os ymlad a|uyn+
ny di dabre y|r maes. Pan|gigleu boỽn
hynny ny|bu kyn laỽenet eiryoet. ac y
kilyassan ergit dỽy saeth y ỽrth y ỻu.
Ac yna boỽn a|estynnaỽd y|daryan. ac a
gymerth y|waeỽ. ac a urathaỽd yr amher+
aỽdyr yg|kanaỽl y|daryan. yny glỽyuaỽd
yn uaỽr ar yr amheraỽdyr. ac y torres y
gledyf. ac y tramkỽydaỽd. ac ual kynt
kyuodi a|oruc yn gyflym. a bỽrỽ neit. a
chaffel maen ydan y droet. a bỽrỽ boỽn
ac ef yn|dic. a|e uedru yn|y daryan yny
dorres yn|drỽc. Ac yna boỽn a dynnaỽd
morglei y gledyf. ac a drewis yr amheraỽ+
dyr ac ef yn gyflym. A phann welas yr
almaenwyr hynny. dyuot a|ỽnaethant
yn ganhorthỽy y eu harglỽyd. ac a|e dodas+
sant ar uarch. a|medylyaỽ gaỻel eu
maedu. Ac ar|hynny nachaf gopart yn
dyuot a|e vydin ac a|e drossaỽl gantaỽ. ac
yn eu bỽrỽ bop dec bop deudec. Ac yna
y dywaỽt boỽn ỽrth gopart. vyng|kare+
dic i heb ef pony wely|di e mae yr amhe+
raỽdyr ar yr amỽs gỽelỽ. ys da a|beth oed
ytti uynet y rỽymaỽ ef. arglỽyd heb·y
copart mi a|wnaf dy vynnu di am hynny.
Ac yna y kerdaỽd copart racdaỽ. ac a|e
drossaỽl arỻỽyssaỽ fford idaỽ a|ỽnaeth.
ac nyt arbedaỽd neb yny doeth hyt att yr

895

amheraỽdyr. a|e gymryt a|wnaeth a|mynet
ac ef y|r casteỻ. a|e rỽymaỽ yn galet. a dyfurys+
syaỽ dracheuyn yn ganhorthỽy o|e arglỽyd.
A|phan|welas yr almaenwyr. dala eu harglỽ+
yd trist uuant. kany eỻynt parhau yn·ep+
peỻ. a gỽrhau a|orugant y boỽn. trỽy estynnv
y cledyfeu idaỽ. ac eu dala a|orucpỽyt ac eu
hanuon y|r kasteỻ. A|dyuot a|oruc boỽn y|r
casteỻ. a phan|deuth ar|ogyuuch a don.
don a|dywaỽt ỽrthaỽ. Arglỽyd heb ef. ny thy+
kya ymi erchi trugared itti. namyn vyg
galanas a|uadeuwn itt. pei ar vn dyrnaỽt
y ỻadut vym|penn. Mal ym gỽares duỽ heb·y
boỽn mi a wnaf hynny. ac heb odric y peris
boỽn dỽyn plymenn. a chladu pỽỻ yn|y day+
ar. a|dodi y blymenn yn|y pỽỻ. a|e ỻennỽi o
blỽm brỽt. a|chymryt don a|e uỽrỽ myỽn
hỽnnỽ. ac yna y|dywaỽt boỽn. yn aỽr y diga+
ỽn syr don ymdrochi. ac o|r|byd annwyt
arnaỽ ef ymdỽymet heuyt. ac yna y redaỽd
neb un att yr arglỽydes y uenegi idi chỽed+
leu y ỽrth don y chymar. A phan|gigleu hi
y gennat yn|dywedut y chỽedleu hynny. hi
a|e byryaỽd a chyỻeỻ newydlif a|oed yn|y ỻaỽ.
ac a|e medraỽd yn y gaỻon ac a|e|ỻadaỽd. ac a
drighaỽd hitheu y benn y tỽr uchaf. ac y
byryaỽd neit odyna yny torres y mynỽgyl.
A|phann|gigleu boỽn hynny nyt ỽylaỽd ef
dim yr hynny. ac nyt aeth ỽrth y hanglaỽd.
Ac yna y goresgynnaỽd boỽn y dylyet. ac
y kynnheỻis mal y|dylyei ỽr deỽr kadarn. a
thalu eu gỽassanaeth y|r niuer a dathoed
gyt ac ef. Odyna y deuth porthmyn y
dref honno y erchi trugared y boỽn. a|e
anregu o|lestri a thrysor. a gỽedy daruot
idaỽ gorchyuygu y elynyon. ef a gyrchaỽd
y wreic uỽyaf a|garei y|r garrec ỽrth y phri+
odi. Ac anuon yn ol escob colỽyn y wneuthur
eu priodas. Ac ynteu a|deuth yn ufud laỽen.
a gỽedy y|dyuotyat yr unbennes a|arỽedỽyt
y|r eglỽys. ac y gỽnaethpỽyt eu|priodas.