Breudwd Rhyddiaith Gymraeg 1300-1425
English

Rhydychen, Llsgr. Coleg yr Iesu 111 (Llyfr Coch Hergest) – tudalen 217r

Ystoria Bown de Hamtwn

217r

872

gyt ac ivor. A phan vyd ef dydgỽeith yn
kerdet y kyuaruu ac ef marchaỽc. a hys+
pys yr adnabu baỽb o·nadunt y gilyd. ac
y|dwylaỽ mynỽgyl yd|aethant. ac o|r diwed
boỽn a|ouynnaỽd Josian idaỽ. Y mae heb
ynteu wedy y rodi y urenhin kyuoethaỽc
ac iuor yỽ y enỽ o ymỽbraỽnt. dinas ar+
bennic oed hỽnnỽ. ac o|r mynny ymwelet
a|hi. tu ac yno y mae reit it vynet. Myn+
naf y·rof a|duỽ heb ynteu. Minneu a va+
nagaf itt y fford. kanys mi a|e gỽn yn|da.
Duỽ a|dalo itt heb·y boỽn. Yna y menegis
y ford. ac yd erchis idaỽ mynet trỽy y di+
nas a|elwir nuble. ac odyno y gartage.
ac odyno ti a|wely mỽbraỽnt. Ac yna ym+
wahanu a|ỽnaethant. a|gỽedy dyuot
boỽn hyt y|mỽbraỽnt. y clywei dywedut
ry uynet iuor a|e|hoỻ niuer gyt ac ef y he+
la. ac na thrigyassei neb yn|y ỻys a|r cas+
teỻ o·nyt Josian a|e braỽtuaeth. a|diruaỽr
lewenyd a|gymerth ynteu o glybot hyn+
ny. a thu a|r ỻys yd aeth ef. a chysseuyỻ
yn ymyl y ỻys a|ỽnaeth heb vynet y myỽn.
Sef y clyỽei iosian yn|wylaỽ yn uchel. Ac
yn|dywedut. Oi a|boỽn de hamtỽn maỽr a
beth y|th gereis. ac y|th garaf. a pha|wed
y bydaf vyỽ inneu kan koỻeis i dydi. Sef
a|ỽnaeth ynteu yna truanhau ỽrthi. ac
yna yn|diwygyat palmer yd aeth y myỽn
y|r|ỻys. ac erchi y ginyaỽ y Josian. Ti a
geffy yn|ỻawen heb hitheu. a|gressaỽ ỽrth+
yt. a dyuot o·honei e|hunan a rodi dỽfyr y
ymolchi. a hitheu a|wassanaethaỽd ac
a|rodes idaỽ yn|didlaỽt bỽyt a|ỻynn. A
gỽedy bỽytta. hi a|dechreuis ymdidan

873

ac ef. a gouyn o ba|le pan hanoed. a|pha|le y
ganydoed. O loeger pan|henỽyf heb yn+
teu ac yno y|m ganet. Sef a|wnaeth hitheu
yna. kymryt diruaỽr lewenyd yndi. a go+
uyn y|r palmer a|atwaenat marchaỽc o
loeger a|elwit boỽn de hamtỽn. atwen yn
hyspys heb ynteu. kar y mi oed y|dat ef me+
gys y dywettpỽyt im. ac nyt oes vlỽydyn
ettỽa yr pann y gỽeleis i ef yn|ỻad kaỽr de+
ỽr a brenhin kyuoethaỽc yn yghwanec.
ac y mae ef yn|y wlat yn iach lawen ac yn
dial y dat yn ffenedic. Wedy ry gymryt
gỽreic dec uonhedic kyuoethaỽc a|e|phriodi.
Gỽreic heb·Josian. Je ys|gỽir heb yntev.
Sef a|wnaeth hitheu yna dygỽydaỽ y|r
ỻaỽr a|ỻewygu. a|ryued vu na bu uarw.
a|gỽedy y|chyuodi o|r ỻewycua. ỻeuein
a|wnaeth yn uchel. a|dywedut. Ys|truan
a amser y|m|ganet i. ac ys|drỽc a|dyn y
thynghetuen ỽyf|i kan koỻeis i boỽn.
Ac nyt oed yn|y byt dyn druanach y chys+
syr no|hi na mỽy y|drycyruerth. Ac yna
edrych yn|graff a|ỽnaeth hi yn wyneb y
palmer. Y palmer heb hi pei na|th welỽn
yn|y dywygyat hỽnn. mi a|gredỽn ac
a|dywedwn panyỽ ti oed boỽn. Na|ui
heb ynteu. a|mi a|e|kigleu ef yn|dywedut
yn uynych am y march ac a ydiỽ hỽnnỽ
gennyt. Och heb hi. y mae y march
yna. ac nyt oes neb o|r|ỻys yma a|ueido
mynet yn|y gyuyl yr|pan|goỻes boỽn y
arglỽyd. ar hynny y doeth y braỽtua+
eth hi attei. ac y|gouynnaỽd hitheu idaỽ.
Beth a|debygy di heb hi am y palmer.
ae boỽn yỽ ef ae nat ef. ac erchi idaỽ my+