Breudwd Rhyddiaith Gymraeg 1300-1425
English

Rhydychen, Llsgr. Coleg yr Iesu 111 (Llyfr Coch Hergest) – tudalen 146v

Trioedd Ynys Prydain

146v

598

aruon a·dan y maen du y dotwes ar|geneu
cath. ac y ar y maen y byryaỽd y gỽruei+
chyat yn|y mor. a meibon paluc ym|mon
a|e magassant yr drỽc udunt. a honno uu
gath baluc. ac a|uu un o deir prif ormes.
mon a uagỽyt yndi. a|r eil oed daronỽy. a|r
dryded etwin urenhin ỻoegyr. Tri annỽ+
yl ỻys arthur. a thri chat·uarchaỽc. ac
ny mynnassant pennteulu arnadunt
eiryoet. ac y cant arthur eglyn. Sef yỽ.
vyn tri chatuarchaỽc mened. a|ỻud ỻuru+
gaỽc. a cholovyn kymry kymry karada+
ỽc. Tri eurgryd ynys brydein. Casswaỻ+
aỽc uab beli. pan|aeth y geissaỽ flur hyt
yn ruuein. a manaỽydan uab ỻud. pan
uu hut ar dyuet. a ỻew ỻaỽgyffes pan
uu ef a gỽydyon yn|keissaỽ enỽ ac ar+
ueu y gan a·ranrot y uam. Tri bren+
hin a uuant o ueibon eiỻon. Gỽryat uab
gỽryan yn|y gogled. a|chadauel uab kyn+
uedỽ yg|gỽyned. a hyueid uab bledic
yn|deheubarth. Tri budyr hafren. Kat+
waỻaỽn pann|aeth y weith digoỻ. a
ỻu kymry gantaỽ. ac etwin o|r parth ar+
aỻ. a|ỻu ỻoegyr gantaỽ. Ac yna y|budra+
ỽd hafren o|e blaen hyt y haber. a|r eil kyua+
rỽs golydan y gan einyaỽn uab bed
brenhin kernyỽ. a|r dryded. calam uerch
Jdon uab ner y gan uaelgwn. ~ ~
Trioed heuyt yỽ y rei hynn~
T Eir unbenngerd yỽ. prydu a
chanu telyn. a|chyuarỽydyt. Tri
pheth a gynneil hir direidi ar dyn.
drycyoni. a dryc·anyan a glythineb.
Tri gorefras direidi. glythineb. ac ym+
lad. ac annwadalỽch. Tri|pheth ny cheiff
dyn digaỽn o·nadunt. hoedel. a Jechyt.
a|chyuoeth bydaỽl. Teir bendyth ny a+
dant dyn y neỽyn nac y noethi os keiff.
bendith y beriglaỽr. a bendyth y arglỽyd
priodaỽr. a bendyth kerdaỽr o|lin gerd.
Teir bendyth yssyd weỻ no|r teir hynny.
bendyth mam. ac un·dat. ac un atuydic.

599

Tri ffynnyant gỽr. eredic tref y dat.
ac ardadlu y dadyl yn da. a dỽyn y blant
ar uoned. Tri gogyflaỽnder gỽr. mynet
yg|kyrch. a gorsed dadleu. ffynnyant yỽ
keissaỽ da. daỽn yỽ y gaffel. detwydyt yỽ
ymgynnal yndaỽ gỽedy as|caffer. Tri
pheth ny|s medyr namyn doeth neu|detwyd.
Ym·adaỽ ac ouered yn amseraỽl. ac a
godineb. ac a|gormod meddaỽt. Dewisseu
dyn yỽ. y uarch yn uaỽr. a|e uilgi yn
vuan. a|e|dir yn|drion. a|e arglỽyd yn hael.
a|e wreic yn duhun diweir. a|e|gedymde+
ith yn|di·dwyỻ. a|e wely yn|da. a|e was
yn esgutlym. Tri rỽyd hynt. efferen. a
chinnyo. a chedymdeith da. Tri afrỽyd
hynt. diaspat. a|drychni. ac ymlit. Tri
ryuel yn|hedỽch. dryctir. a drycwreic.
a|dryc·arglỽyd. Tri ymborth gỽr. hela.
a chyfnewit. ac eredic. Tri thywyssoga+
eth detwyd. bot yn da y wassanaeth. a|e
annyan. a|e gyfrinach. a|hynny ny chyng+
hein namyn gan grefydus neu uonhedic.
Tri pheth yssyd iaỽn y|diolỽch y dyn. gỽa+
haỽd a rybud ac an·rec. Tri dyn y mae
iaỽn bot yn|da ỽrthunt. gỽedỽ. ac aỻtut.
ac ymdiuat. Tri dyn y mae iaỽn rodi bỽyt
udunt. ymdeithic. a|golochỽydỽr. a|ỻauu+
rỽr. Tri char|elyn dyn. tan a dỽfyr. ac
arglỽyd. Tri pheth y ardyrchauel gỽr.
gỽreic duhun diweir. ac arglỽyd diwyt
kadarn. a|diffleis hedỽch. Tri pheth a
darestỽng gỽr. dryctir a drycwreic. a dryc+
arglỽyd. Tri aghyuartal byt. berthaỽc
a charu. ac angheu. Tri glỽth byt. mor.
ac arglỽyd a|dinas. Tri chyffredin byt.
gỽreic. a chlaỽr taỽlbỽrd. a thelyn. Tri
pheth ny eỻir bot hebdunt yr meint a|w+
nelont o|drỽc. tan. a|dỽfyr. ac arglỽyd.
Tri pheth a|syrth ar dyn heb wybot idaỽ.
hun. a heneint. a phechaỽt. Tri merthyr+
olyaeth heb lad dyn. haelder yn|tlodi. a|di+
weirdeb yn ieuenctit. a chamgynnal heb
gyuoeth. Tri melys byt. methu. a ffynnv.
[ a|phechu.