Breudwd Rhyddiaith Gymraeg 1300-1425
English

LlB Llsgr. Harley 958 – tudalen 43r

Llyfr Blegywryd

43r

weithret cỽbẏl sarhaet a|tal. Goronỽẏ ab
ovridic a dẏwedei na dẏlẏ gỽr ẏr bot gan
wreic gỽr araỻ a|r wreic ẏn|da genthi talu
dim idaỽ. tra ganmolho hi ẏ gweithret. Ac
o|bẏd honheit ẏ gweithret. ẏ wreic a dẏlẏ
talu ẏ sarhaet ẏ gỽr. neu ẏ gỽr a|e gỽrthotto
ẏn ryd. O|r dỽc gỽr wreic ẏn ỻathrut a|mẏ+
net ẏ·gẏt a|hi ẏ|tẏ uchelỽr. kẏmeret ẏr uchel+
ỽr vach ẏ|gan ẏ gỽr ar hoỻ iaỽn ẏ wreic
kẏn no chẏscu ẏgẏt ohonunt. Diffeith
brenhin ẏ dẏ·wedir. Morỽẏn. Ac ỽrth hẏn+
nẏ ẏ|dẏlẏ ẏ brenhin ẏ hamobyr. ~  
G obẏr merch brenhin. hwe phunt ẏỽ.
Ac ẏ|r vam ẏ telir. kanẏs tir uẏd ẏ cho+
wẏỻ. ẏ|meint a welho ẏ gỽr ẏ vot ẏn iaỽn.
Pedeir punt ar dec uẏd ẏ hegwedi. Gobẏr
merch penkenedẏl ẏỽ punt. Gobẏr merch
uchelỽr ẏỽ hweugeint. Gobẏr merch bila+
en. pedeir ar|hugeint. Gobẏr allthudes. pe+
deir ar|hugeint. Gobẏr merch bonhedic can+
hỽẏnaỽl. pedeir ar|hugeint. Megẏs ẏ|dẏlẏ
|gỽr rodi meicheu dros ẏr egỽedi; veỻẏ ẏ|dẏ+
lẏ reeni ẏ uorỽẏn rodi meicheu na wnel hi+
theu goỽc ẏn erbẏn ẏ gỽr. 
P vnt ẏỽ gwerth gwestua brenhin. hwe+
ugeint dros ẏ bara. A|thrugeint dros