Breudwd Rhyddiaith Gymraeg 1300-1425
English

LlB Llsgr. Harley 958 – tudalen 34v

Llyfr Blegywryd

34v

tal. Pẏ rẏỽ bẏnhac uo ki taẏaỽc. pedeir kei+
naỽc vẏd ẏ werth onẏt bugeilgi uẏd. A hỽn+
nỽ trugeint a tal. Os raculaenu ẏr ẏscrẏ+
bẏl a wna ẏ bore. a dẏuot ẏn eu hol ẏ|diwe+
dẏd. Ac eu kẏlchẏnu teir gweith ẏn|ẏ nos.
A gaỻu o|e perchen a chẏmodaỽc uch ẏ drỽs ac
araỻ is ẏ drỽs. kadarnhau hẏnnẏ ẏn wir.
Kostaỽc kẏt bo brenhin neu vreẏr bieiffo.
vn werth vẏd a chostaỽc ẏ bilein. Ki kaỻaỽ+
ed o|r ỻedir peỻach naỽ kam ẏ ỽrth ẏ tẏ nẏ the+
lir dim ẏmdanaỽ. Os o uẏỽn ẏ naỽ cam. pe+
deir ar hugeint a|tal. Betheiat nẏt oes werth
kẏfreith arnaỽ. kanẏt oed ẏ kẏfrẏỽ gi hỽn+
nỽ ẏn oes hẏwel da. gwerth damdỽg a uẏd ar
pop peth nẏ bo gỽerth kẏfreithaỽl arnaỽ ẏn ẏs+
criuenedic. O|r kẏrch ki neb dẏn. dotet ẏ araf
rẏdaỽ a|r ki. ac od|a ar ẏr arẏf ẏnẏ lather. nẏ the+
lir dim drostaỽ. O|r brath ki neb dẏn ẏnẏ del
ẏ gỽaet perchen ẏ ki a dẏlẏ talu gỽerth ẏ gwa+
et ẏ|r brathedic. Ac o|r ỻad ẏ brathedic ẏ ki kẏn
ẏ dianc ẏ ỽrthaỽ. nẏ cheiff namẏn vn ar pẏm+
thec dros ẏ waet. Ki kẏneuodic ar vrathu
dẏnẏon o|r brath tri dẏn. ac na|s ỻadho ẏ|arglỽ+
ẏd a|raff o dỽẏ rỽẏhant*. Ac ẏno ẏ lad. a|tha+
let gamlỽrỽ ẏ|r brenhin.