Breudwd Rhyddiaith Gymraeg 1300-1425
English

LlB Llsgr. Harley 958 – tudalen 28v

Llyfr Blegywryd

28v

sic ẏ ỽrtheb ẏ neb o vaes ẏ sened o|r kameu
a dẏwetter arnaỽ. Os gỽr eglỽẏssic a gẏn+
heil tir trỽẏ dẏlẏet dan ẏ brenhin ẏ perthi+
no gỽneuthur gwassanaeth ẏ|r brenhin o·ho+
naỽ. ef a dẏlẏ gỽrtheb ẏn ỻẏs ẏ brenhin o|r
tir a|e perthẏneu. kanẏs brenhin bieu tir ẏ|tẏr+
nas oỻ. Ac onẏ ỽrtheb o|r tir ẏn ufẏd ẏ brenhin
bieuẏd. kẏt gaỻo gỽr eglỽẏssic uot ẏ mẏỽn
barn o vreint tir gẏt a|ỻeẏgẏon. ẏnẏ uo am+
ser ẏ datganu. nẏ dichaỽn datganu barn
trỽẏ gẏfreith rỽg ẏ kẏnhenusson. kanẏt
oes werth ar ẏ tauot gossodedic ẏg|kẏfreith
trỽẏ ẏr hỽn ẏ poenir pob braỽdỽr a rotho cam+
varn os kadarnha trỽẏ ẏ·mỽẏstlaỽ. Tri
gỽrtheb ẏssẏd. Adef. neu wat. neu amdiffin
nẏt cỽbẏl vn gwat ẏnẏ talher cỽbẏl reith
a perthino ỽrth ẏ dadẏl. na ỻỽ vn dẏn
na ỻỽ ỻiaỽs. LLe ẏ perthẏno reith gỽlat.
ẏno ẏ dẏlẏ ẏ brenhẏn kẏmheỻ reithwẏr
ẏ greir ẏ tẏghu ẏn dẏlẏedus gẏt a|r|gwat+
ỽr neu ẏn|ẏ erbẏn ar eu dewis. Reith gỽ+
lat ẏỽ ỻỽ degwẏr a deugeint o wẏr tira+
ỽc dan ẏ brenhin.  ỻe nẏ perthẏno reith
gỽlat. ẏno ẏno* ẏ dẏlẏ ẏ gỽatỽr keissẏaỽ
reithwẏr trỽẏdaỽ e|hunan mal ẏ barner.
Nẏt cỽbẏl vn amdiffẏn ac nẏt paỻedic