Breudwd Rhyddiaith Gymraeg 1300-1425
English

LlB Llsgr. Harley 958 – tudalen 16r

Llyfr Blegywryd

16r

r eil ẏỽ kẏmrẏt o ẏscolheic wreic o rod
kenedẏl a|chaffel mab o·honei. Ac odẏna
kẏmrẏt o|r ẏscolheic urdeu effeiradaeth.
Ac odẏna kaffel mab o|r vn wreic o|r ef+
feirat. nẏ dẏlẏ ẏ mab a gahat kẏn noc
ef kẏfrannu tir a hỽnnỽ. kanẏs ẏn er+
bẏn dedẏf ẏ kahat. Trẏdẏd ẏỽ mut. kanẏ
dẏlẏ tir neb atteppo drostaỽ. kanẏ rodir gỽ+
T ri dẏn a|gẏnnẏd eu brein[ lat ẏ uut.
ẏn vn dẏd. taẏaỽc·tref ẏ kysseccrer
eglỽẏs ẏndi gan ganhat ẏ brenhin. dẏn
o|r tref honno a vei ẏ bore ẏn taẏaỽc a|r
nos honno ẏn ỽr rẏd. Eil ẏỽ ẏ dẏn ẏ ro+
tho ẏ brenhin vn o|r pedeir sỽẏd ar ugeint
ỻẏs breinhẏaỽl idaỽ. kẏn rodi ẏ sỽẏd idaỽ
ẏn taẏaỽc. a gỽedẏ ẏ rodi ẏn ỽr rẏd. Trẏ+
dẏd ẏỽ ẏscolheic ẏ dẏd ẏ kaffo corun ẏn
vab taẏaỽc. A|r nos honno ẏn ỽr rẏd. 
T ri gwerth kẏfreith beichogẏ gỽreic.
vn ẏỽ gỽaet kẏn delwat. ỽẏt* a deu+
geint a tal. o|r coỻir trỽẏ greulonder. Eil
ẏỽ kẏn dẏuot eneit ẏndaỽ o|r coỻir trỽẏ
greulonder. traẏan ẏ alanas a telir ẏm+
danaỽ. Trẏdẏd ẏỽ. gwedẏ ẏd el eneit
ẏndaỽ talỽ cỽbẏl o|e alanas a dẏlẏir o|r
coỻir trỽẏ greulonder. ~ ~