Breudwd Rhyddiaith Gymraeg 1300-1425
English

LlB Llsgr. Harley 958 – tudalen 15r

Llyfr Blegywryd

15r

dir ẏn ỻẏs ac nẏ|ffẏnnẏant. gwat kẏn
detrẏt. A ỻẏs kẏn amser. Cof a|chẏghaỽs
gwedẏ braỽt. Tri ouer laeth ẏssẏd. ỻaeth
kath. A ỻaeth gast. A ỻaeth cassec. nẏ di+
wẏgir dim ẏmdanunt. Teir sarhaet
nẏ diwẏgir o|r keffir drỽẏ ueddaỽt. sar+
haet ẏr effeirat teulu. A|r ẏgnat ỻẏs.
A|r medic ỻẏs. kanẏ dẏlẏ vn o|r|tri hẏn+
nẏ bot ẏn ueddỽ bẏth. kanẏ ỽdant pẏ
amser ẏ bo reit ẏ|r brenhin ỽrthunt. Teir
paluaỽt nẏ diwẏgir. vn arglỽẏd ar ẏ
ỽr ẏn|ẏ reoli ẏn dẏd kat a brỽẏdẏr. Ac
vn tat ar ẏ vab ẏr ẏ gospi. Ac vn ẏ penke+
nedẏl ar ẏ gar ẏn|y gẏghori. 
T eir gwraged a dẏlẏ eu meibon tref
eu mam. gỽreic a|rother dros ẏ|that
|gỽẏstẏl. a chaffel mab o·honei ẏn|ẏ gỽẏ+
stlorẏaeth. A gỽreic a rother o rod kenedẏl
|aỻtut. A gỽreic a lather gỽr o|e chenedẏl.
A dial o|e mab hỽnnỽ. nẏ dẏlẏir ẏ oedi am
tref ẏ vam nac arhos naỽuetẏd ẏn|ẏ erbẏn.
Teir sarhaet gỽreic ẏnt. vn a drẏcheif ac
vn a ostỽg. Ac vn ẏssẏd sarhaet gỽbẏl.
kẏntaf ẏỽ bot genthi o|e hanuod. A hon+
no gan vn ar·drẏchauel ẏ telir idi. r
eil ẏỽ rodi cussan idi o|e hanuod. A honno