LlB Llsgr. Harley 958 – tudalen 12v
Llyfr Blegywryd
12v
peth o|r a del ẏ|r sant o offrỽm. Ac nẏt
aỻaỽr nac ẏ neb araỻ. O ẏmlad a wnel+
her ẏn ỻys ỻe ẏ bo eistedua brenhin
distein a dichaỽn bot ẏn haỽlỽr os yr
ẏmladwẏr nẏ chỽẏnant. kanẏs torri
tagnef ẏ ỻẏs ẏỽ. Nẏ diskẏn camlỽrỽ
o ẏmlad o·nẏd trỽẏ tẏstolẏaeth nẏ aỻer
ẏ ỻẏssu. a tẏster trỽẏ ẏmhaỽl. O ẏmlad
a wnelher ẏ mẏỽn nodua gỽaet neu gle+
is a seif ẏn tẏstolẏaeth ẏ|r abat a|r effei+
reit trỽẏ vreint eglỽẏsic ẏr abadaeth. O|r
bẏd ẏmlad ẏn ỻẏs peunẏdẏaỽl ẏ bren+
hin. dirỽẏ pob vn o|r ẏmladwẏr heb wa+
du o vn o·honunt ẏn erbẏn ẏ gilẏd nac
ẏn erbẏn ẏ distein hwephunt uẏd. Os o
uaes ẏ|r ỻẏs ẏ bẏd. teir punt uẏd. O|r pal+
la reith ẏ neb a diwatto ẏmlad. dirỽẏus
dirỽẏus* uẏd megẏs na wattei dim. Di+
uỽẏn dirỽẏ treis morỽẏn ẏỽ gwialen
arẏant. a|ffiol eur a|chlaỽr eur mal ẏ dẏ+
wespỽẏt am eu messureu ẏn diuỽẏn sar+
haet brenhin. Diuỽẏn dirỽẏ ẏmlad ẏỽ
deudeg|mu. Diuỽẏn dirỽẏ ledrat ẏỽ. kys+
sỽẏnaỽ ỻedrat ar dẏn. a gwadu o·ho+
naỽ ẏn da ar ẏ tauaỽt. A gossot reith
arnaỽ a|e phaỻu. ỻeidẏr kẏfadef can
| « p 12r | p 13r » |