Breudwd Rhyddiaith Gymraeg 1300-1425
English

LlB Llsgr. Harley 958 – tudalen 10v

Llyfr Blegywryd

10v

o laỽ ẏ laỽ. O|r bẏd vn ỻaỽ eisseu o hẏn+
nẏ ẏn ẏmffẏdẏaỽ balaỽc uechni ẏ gelwir
honno. eithẏr ẏ ỻe ẏd el dẏn ẏn vach kẏn+
nogẏn. drostaỽ e|hunan neu dros araỻ.
nẏ|s rotho ẏn vach. Ansaỽd balaỽc ẏỽ
bot ẏ neiỻ pen idaỽ ẏn rỽẏm. a|r ỻaỻ ẏn
rẏd. Ac ỽrth hẏnnẏ o|r kẏmer ẏ dẏlẏaỽ+
dẏr fẏd ẏ talaỽdẏr ar talu ẏ dẏlẏet. A
ffẏd y mach ar gymeỻ ẏ talaỽdẏr. pob
vn ohonunt a dẏlẏ gỽrtheb o|e amot
|r dẏlẏaỽdẏr. Onẏ|chẏmer onẏt fẏd
vn o·honunt. nẏ dẏlẏ eithẏr vn gỽrtheb
idaỽ. Heuẏt o|r dẏrẏ ẏ mach fẏd ẏ|r dẏ+
lẏaỽdẏr ar gẏmheỻ ẏ dẏlẏet idaỽ ef
a dẏlẏ gỽrtheb idaỽ o|r dẏlẏet oỻ. kẏ+
nẏ chẏmerho fẏd ẏ talaỽdẏr. Gỽedẏ
del oet dẏt talu. ẏ mach a dẏlẏ oet dẏd ẏ
gẏfarch ẏ talaỽdẏr. O oet mach ẏ paratoi
tal vn dẏd ac ỽẏthnos o|r bẏd reit idaỽ ta+
lỽ. O teir ford ẏd oedir mach a|chẏnnogẏn
o glẏbot cor*|brenhẏn ẏn mẏnet ẏn ỻuẏd.
Ac o haỽl treis Ac o haỽl ledrat. Teir mefẏl+
ỽrẏaet mach ẏssẏd. gwadu ẏ vechni ac ef
ẏn vach. Ac adef ẏ vechni ac na aỻo ẏ chẏ+
meỻ. A diebrẏd mach gwedẏ rother. 
Mach a|dẏlẏ dỽẏn gauael gẏt a|r dẏlẏ+