Breudwd Rhyddiaith Gymraeg 1300-1425
English

LlB Llsgr. Harley 4353 – tudalen 35r

Llyfr Cyfnerth

35r

y weir. ac ymlad o·honunt yn| y gỽarchae. A llad
o| lỽdyn y llall. perchennaỽc yr yscrybyl bieu
talu y llỽdyn a| lather. a|r deilyat a uyd ryd.
E Neb a| watto mach; rodet y lỽ ar y seith  ̷+
uet o|r dynyon nessaf y werth. petwar
o parth y tat a deu o parth y vam ac ynteu e
hunan seithuet. Y neb a watto mechniaeth;
rodet y lỽ ar y seithuet yn| y kyffelyp vod. Ac
ony byd y| genedyl yn vn wlat ac ef. rodet y
lỽ e| hunan uch pen seith allaỽr kyssegyr yn vn
gantref ac ef. kanys uelly y gỽedir bri·duỽ.
O teir fford yd ymdiueicha mach; o talu o|r
talaỽdyr drostaỽ. Eil yỽ o rod* oet o|r haỽlỽr y|r
talaỽdyr yn aỽssen y vach. Trydyd yỽ o dỽyn
gauel o|r haỽlỽr ar y talaỽdyr heb ganhat y
mach. ac yna talet tri buhyn camlỽrỽ y|r
brenhin. Oet mach y ỽybot ae mach ae nat
mach; tri dieu. Yspeit mach y paratoi tal
os ef e| hunan a|e tal gyssefin. naỽ nieu.
O teir fford y differir mach a chynnogyn. o
glybot corn y brenhin yn mynet yn lluyd.
Ac o haỽl treis. Ac o haỽl ledrat. kanys aghen
yn aghen yỽ pop vn o|r holyon hyn. Mach
a dyly dỽyn gauel gyt a|r haỽlỽr. hyt yn diogel.
a godef arnaỽ y gofut a del. Ac ony wna hynny;