Breudwd Rhyddiaith Gymraeg 1300-1425
English

Llsgr. Caerdydd 3.242 (Hafod 16) – tudalen 90

Y Pedwar Defnydd

90

canu* yn vynych. kigaỽc vyd a dewr. ehofyn a|detwyd. bỽydeu
ardymheredic. a|diodyd drỽy y ỻysseuoed goreu a berthyn
idaỽ. Yr|eil yỽ; colera. yr hỽnn yssyd wressaỽc a gỽlybora+
ỽc. ac vn natur a|r tan yr hỽnn yssyd vynychaf yn amser
haf. a ieuengtit dynaỽl a|gỽynt y gogled. y rei hynn sych
a gỽressaỽc ynt. y ỻe y bo hỽnnỽ yn bennaf bleỽaỽc vyd
y|dyn. a thỽyỻwr. a|chreulaỽn. hael. ac eidic a chaỻ. ac adue+
in a|sychedic. a gỽineugoch y vleỽ. bychan vyd y|deissyf. a ma+
ỽr vyd y|aỻu. bỽydeu ardymeredic. a|diodyd drỽy lysseuoed go+
eron yssyd y ostỽng angerd a gỽres. Trydyd yỽ; gỽlybỽr|fleu+
ma. a|hỽnnỽ a|uyd gỽlyboraỽc ac oeruelaỽc. ac vn natur
a|r|dỽfyr y gaeaf a gỽynt y gorỻewin a jeuengtit dynaỽl.
kanys y rei hynn a|vyd gỽlyboraỽc ac oeruelaỽc. yr hỽnn y|bo
yndaỽ y|fleuma yn|drechaf. kysgadur vyd a|ỻesc. a ffrom sorri yn vy+
nych a fol vyd y synhỽyr. Wyneb bras gỽynn. maỽr vyd y
deissyf a bychan y|aỻu. bỽydeu gỽressaỽc. a|diodyd drỽy lysse+
uoed gỽressaỽc y ostỽng y angerd. Malencolia; oer vyd a
sych. ac vn natur a|r|daear. ac yn amser gynhaeaf a heneint
dynaỽl. a gỽynt y|dỽyrein y byd. oer ynt a|sych. Y|neb y bo
yndaỽ Malencolia yn|drechaf; kenuigennus uyd a thrist
a chebyd. a thỽyỻỽr a ỻaes. ac ofnoc. a ỻiỽ tomlyt. bychan
vyd y|deissyf. a bychan vyd y|aỻu. ac aniweir vyd. bỽyt gỽ+
ressaỽc. a|diodyd trỽy lysseuoed gỽressaỽc y ostỽng gỽenỽyn.
yr hỽnn y bo yndaỽ y pedwar gỽlybỽr yn gyffredin; iach
vyd y|dyn hỽnnỽ. ac o|r gormeila vn o·honunt ar|y gilyd
hỽnnỽ a|beir y clefyt ar|y dyn. ~ ~