Breudwd Rhyddiaith Gymraeg 1300-1425
English

Llsgr. Caerdydd 3.242 (Hafod 16) – tudalen 45

Llythyr Aristotlys at Alecsander: Rheolau Iechyd

45

o|th wely; rottya dogyn. odyna ymestyn dy aelodeu drỽy
grynoi dy benn a|th vynỽgyl. a hynny a|gadarnhaa y
korff. a|chrynoat y penn a wna rydec yr anyan o|r kyỻa
y|r penn. ac o|r penn pan gysgych y syrth y|r korff drachefyn.
Yr haf; ymeneina myỽn dỽfyr oer a hynny a|gynneil
gỽres yn|y penn. ac o|hynny y megir chỽant bỽyt. Gỽe+
dy hynny gỽisc diỻat tec ymdanat. kanys medỽl dyn
a lawenhaa myỽn petheu tec a|r gaỻon a|drycheif. Ody+
na sych dy danned a risc y koỻ sychyon kanys gloewon
vydant o hynny. ac eglurach vyd dy ymadraỽd a pherach
vyd yr|anadyl. Saf weitheu myỽn amseroed. kanys  ̷
ỻes maỽr a|wna. ac agori y greadur. a breisgau a|wna y
mynỽgyl. a gỽeỻ vyd ỻiỽ yr|wyneb. a breisgau a|wna dy
vreicheu. a gỽeỻau yr|olỽc. a rỽystraỽ arnat lỽydaỽ a|cha+
darnhau dy gorff. Ymdidan a cherdet aruer ohonunt val
yd aruereist o vỽyta ac o yfet yn gymhedraỽl gỽna. a
ỻauurya dogyn o gerdet neu o varchogaeth. kanys nerth+
au y korff a wna. a|dinustyr gỽynnoed o|vyỽn y|r kylla.
ac esgudach vyd dyn a chryfach a gỽressogach vyd y|gy+
ỻa. a|thynerach vyd y|gieu o hynny. Pan gymerych vỽ+
yt; kymer y bỽyt mỽyaf a gerych os|keffy. ac yn enwe+
dic bara sur o|r bỽydeu gỽann haỽssaf vyd y|r kyỻa
y|dreulaỽ. dyeithyr o|r bỽydeu deuryỽ vỽyt yssyd; bỽyt
gỽann a bỽyt kadarn. bỽyta y bỽyt kadarn yn gyntaf
kanys gỽressogach vyd gỽaelaỽt y kyỻa no|e eneu a
nes yỽ yr|avu o|r hỽnn y keiff y|wres ohonaỽ. Pan vỽ+