Breudwd Rhyddiaith Gymraeg 1300-1425
English

Llsgr. Caerdydd 3.242 (Hafod 16) – tudalen 29

Meddyginiaethau

29

E  yfyr hỽnn a|wnaeth Galien. ac ypocras; y fusuc+
wyr a|r medygon goreu o|r a vu eiryoet. yr hỽnn
a|dynnassant ỽy ac a|gasglassant o|r ỻyfreu dewissaf a|go+
reu rac pob ryỽ gleuytyeu a doluryeu o|r a|vei ar gorff|dyn.
ac yn gyntaf y dywedỽn ni am vedeginyaetheu penn.
kanys pennaf aelaỽt ar|y korff yỽ|r pennRac gỽaeỽ yn|y
pennkymer. y danhogen. a|r|wermot. a|r walwort. a|r celidon.
a|r verueyn. a saygh. a phybyr a briỽ ỽynt a berỽ myỽn
dỽfyr. ac yf y|diaỽt honno yn unprydyaỽl. Araỻ yỽ; kymer.
y danhogen. a|r verueyn. a|r wermot. a berỽ ỽynt a golch
dy benn ac ef deirgỽeith yn|yr wythnos. a da yỽ. Araỻ yỽ;
y lanhau penn; bỽyta wreid y pelydyr tridieu ar untu a
da yỽ hynny. Rac dolur y penn ac y lanhau yr emennyd a|r
ỻygeit. kymer y danhogen. pullegium. hulwrt. auans. saygh.
streberi. verueyn. rut. celidon. ffenigyl. wermot. ros. kymeint
o|bob vn o·honunt a|e gilyd. a|berỽ myỽn dỽfyr. ac yf yn|gyn+
taf diot da yỽ. Rac dolur penn; kymer. y danhogen. a|r wermot.
verueyn. celidon. walwort. saygh. a|phump gronyn o bybyr.
a briỽ ỽynt ygyt a berỽ mỽyn dỽfyr ac yf ef yn unpryty+
aỽl. Eli rac dolur penn; kymer. sud y walwort. a|chỽyr new+
yd. ac ystor. a berỽ ygyt. ac a hỽnnỽ ir dy eneitrỽydeu. Y
dorri gỽaetlin; kymer y|dynat pigaỽc a briỽ a thempra ỽynt
gyt a vinegyr. a|chlỽm yn galet ỽynt ar|y brath neu|r|dyrna+
ỽt. Araỻ yỽ; kymer. deil y|morgelyn a briỽ yn|da myỽn morter
a|chymer emenyn o laeth gỽarthec a berỽ a|glanhaa ef ỽrth
y verỽi. a|dot gyt ac ef y deil hynny ar|y tan. ac odyna gỽ+
asc ef drỽy ganuas a|dot myỽn blỽch y gadỽ. Arall yỽ;