Breudwd Rhyddiaith Gymraeg 1300-1425
English

Llsgr. Caerdydd 3.242 (Hafod 16) – tudalen 22

Meddyginiaethau

22

froeneu. a|hyt y bych yn aruer o|r vedeginyaeth honno. aruer
o yfet sud y wermot gyt a gỽin. Rac dolur clusteu. ryỽ amser
ef a|daỽ dolur myỽn clusteu o dra·gỽlybỽr. amser araỻ ef a|vac
pryf myỽn clust. ac o achaỽs hynny val hynn y medeginyey+
thir; kymer. wynỽyn a thorr yn|deu hanner. a|gỽna bỽỻ ym|pob
hanner idaỽ. a|dot yndaỽ oyl a|ỻinat. a|dot y bobi ar|y ỻudỽ yny
vo gỽressaỽc. a|gỽna idaỽ verỽi. a dot yn dỽym yn|clust. Araỻ
yỽ; kymer. y wermot. a|chalaimit. origan. a|sauin. a berỽ ỽynt
myỽn dỽfyr. a|dot beth ar wyneb y crochan nyt amgen claỽr
a|thỽỻ yn|y genaỽl. a|gỽna bib. a|dot y|neiỻ benn y|r bib ar|dỽỻ
y claỽr a|r ỻaỻ yn|y clust val y|del y mỽc ar|hyt y|bib yn|y|glust
a|chadỽet y benn yn wressaỽc val y chỽysso. ac ony byd gỽeỻ yr
hynny arỽyd bot pryf yndaỽ. neu bostỽm. ac ygyt a|r arỽydon
hynny y|gỽybydy di y ỻe y bo ef chỽydaỽ a|wna a|gỽaeỽ a|vyd
yndaỽ. ac yna y|dodir ỽrthaỽ val ỽrth bostỽm. Ac ony byd yr
arỽydon hynn arnaỽ gỽybyd di vot y pryf yn magu yndaỽ.
ac y|ỽ lad ef ac y||dynnu y|maes; dot sud y mintan yn|y clust.
a|chymysc win gỽynn ac ef. Y weỻau clybot dyn; kymer. drỽngk
baed a|mel glan. a|chymysc yn|da ygyt a gat y defni myỽn
y clust gỽedy claerhao myỽn tỽymder ỻefrith pan odroer. 
Araỻ yỽ; kymer. lyssewyn a|elwir troet y|ỻeỽ. a mortera gyt a|r
trỽngk uchot a|dot yn|y clust. Araỻ yỽ; kymer sud y morgelyn
a|dot yn|dỽym yn|y clust. ac o|r byd pryf yndaỽ ef a|e ỻad. ac a|lei+
haa y dolur. Araỻ yỽ; kymer wrysc onn. neu wyal onn iryon
a dot ar|y tan y losgi. a dot lester y erbynyeit y dỽfyr a|del o ben+
neu y prenneu tra vont ar|y|tan. a|dot gyt a|r dỽfyr hỽnnỽ
sud ỻysseu y clusteu a gỽin kymeint o bop vn a|e gilyd. a|blonec