Breudwd Rhyddiaith Gymraeg 1300-1425
English

Llsgr. Caerdydd 1.363 (Hafod 2) – tudalen 95v

Brut y Brenhinoedd

95v

nnychv. Ac en dyannot anvon kennadeỽ a orỽc
hyt en escotlont a gwahawd cant marchaỽc o|r
ffychtyeyt ac eỽ kymryt ar teylỽ y brenyn. Ac g+
wedy eỽ kymryt eỽ hanrydedỽ a gwnaey ortheyrn
er rey henny y ar pavb ac eỽ kyỽoethogy o amra+
valyon rodyon. ac en wuy no meynt eỽ llenwy o|r bw+
yt ac o|r llynn megys ed oedynt wynteỽ en|y kym+
ryt ef en lle brenyn. Ac e fford e kerdynt ar hyt er
estrydoed ar heolyd ar kywydeỽ a chanỽeỽ e kenynt
teylwng yw gortheyrn o amherodraeth teylwng
yw o teyrnwyalen enys prydeyn. ac|antheylwng
yw constans. Ac wrth henny mwyfwy ed anryd+
edey ortheyrn wynteỽ o amravalyon rodyon h+
yt pan vey mwy e keryt enteỽ y ganthvnt wyntev.
Ac gwedy gwybot o·honaỽ kaffael eỽ kareat wynt
en hollavl ef a|e gwnaeth wynt en vedv ac a dywaỽt
wrthvnt y vot ef en adav enys prydeyn ac en myn+
et y keyssyav kyvoeth en lle arall a vey mwy noc
a oed ydav. a dywedwyt na alley ef ar bychydyc
kyvoeth oed ydaỽ gossymdeythyaỽ dec marchavc
a dev  vgeynt. Ac evelly en tryst mynet o|y lety.
ac|eỽ hadaỽ wyntev en yvet en e nevad. Ac gwedy